Halla Tómasdóttir, forseti Íslands, tók á móti Volodimír Selenskí for­seta Úkraínu á Bessa­stöðum í morgun. Hún ákvað að klæðast íslenskri hönnun við tilefnið.

Halla klæddist langermatopp og pilsi í stíl frá íslenska fatahönnuðinum Anitu Hirlekar. Fötin eru úr haustlínunni og eru hin glæsilegustu. Þau eru úr plíseruðu nylon-efni sem fellur yfirleitt vel og þykir mjög þægilegt.

Anita Hirlekar lærði fatahönnun í hinum virta listaháskóla Central Saint Martins í Lundúnum. Hún starfaði í Lundúnum áður en hún flutti hingað til lands og stofnaði sitt eigið fatamerki. Fatamerkið var stofnað árið 2014 og fagnar því tíu árum.

Toppurinn kostar 37.500 krónur og pilsið það sama. Samkvæmt heimasíðu merkisins koma fötin í mjög takmörkuðu upplagi.

Toppurinn er frá íslenska fatahönnuðinum Anitu Hirlekar.

Klassískt pils sem má nota við margt.