Forseti Alþýðusamband Íslands er ánægður með lækkandi verðbólgutölur en hefur einhverjar áhyggjur af hækkandi matvöruverði.

Tólf mánaða verðbólga mæl­ist nú 5,1% og lækk­ar um 0,3 pró­sentu­stig frá fyrri mánuði.

Frétt af mbl.is

Verðbólga komin niður í 5,1%

„Þetta segir mér að það sem við vorum að gera – leggja grunninn fyrir fyrirtæki og aðra að vera ekki með hækkanir – sýnir okkur að við erum á réttri leið með verðbólguna,“ segir Finnbjörn Hermannsson, forseti ASÍ, í samtali við mbl.is og vísar þar í stöðugleikasamninga sem undirritaðir voru í mars á þessu ári – samhent átak vinnumarkaðsins til þess fallið að halda aftur af óhóflegum launa- og verðhækkunum. 

Finnbjörn Hermannsson, forseti ASÍ. mbl.is/Kristinn Magnússon

Hefur áhyggjur af matvöruverði

En á sama tíma sér Finnbjörn ljósgráa bliku á lofti sem hann vonast að verði ekki að stærra regnskýi. Matvöruverð hækkaði nefnilega um eitt prósent samkvæmt nýjustu mælingum Hagstofunnar.

„Það hefur áhrif inn í verðbólguna. Hvort það haldi áfram vitum við ekki en við vonumst til þess að hún haldi áfram að lækka,“ segir hann.

„Þetta gefur okkur sýn á það að Seðlabankinn hafi fulla ástæðu til að lækka stýrivexti í næstu ákvörðunartöku sinni.“

Frétt af mbl.is

Ánægjulegt að ávinningur birtist í lægri verðbólgu

Í téðum stöðugleikasamningum felst endurskoðunarákvæði sem er háð því hvort 12 mánaða verðbólga mælist yfir 4,95% í ágúst 2025 og að verðlagsforsendur teljast hafa staðist ef verðbólga á tímabilinu mars – ágúst er 4,7% eða lægri miðað við árshraða.

Finnbjörn kveðst bjartsýnn að það þurfi ekki að nýta þessu þessi forsenduákvæði.

„Það er bara verðbólgan sem er mælikvarði hjá okkur og ef fram fer sem horfir eigum við að ná markmiði okkar og eigum að halda kaupmættinum sem við vorum með, jafnvel auka hann.“