Vinir bandaríska leikarans Matt LeBlanc eru sagðir áhyggjufullir vegna andlegrar heilsu hans.

LeBlanc, sem sló eftirminnilega í gegn í hlutverki Joey Tribbiani í gamanþættinum Friends, hefur að sögn heimildamanna einangrað sig frá umheiminum í kjölfar andláts Matthew Perry sem lést þann 28. október í fyrra af völdum of stórs skammts af ketamíni.

LeBlanc og Perry, sem fór með hlutverk hins ástkæra Chandler Bing, léku bestu vini í tíu ár í hinum sívinsæla gamanþætti og voru einnig góðir félagar í raunheimum.

Leikarinn, sem er 57 ára, hefur lítið sést opinberlega síðustu mánuði og fór síðast með hlutverk í sjónvarpsþáttaröðinni Man with a Plan sem hætti göngu sinni árið 2020.

Frétt af mbl.is

Perry lagður til hinstu hvílu

Góðvinkonur LeBlanc, leikkonurnar Jennifer Aniston og Courtney Cox, eru sagðar hafa vakandi auga með honum þar sem leikarinn sé enn að takast á við sorgina.

Stöllurnar eyða víst miklum tíma á heimili LeBlanc, sérstaklega Aniston, sem hefur reynst leikaranum mjög mikilvægur stuðningur á síðustu tólf mánuðum.

Frétt af mbl.is

Joey kveður Chandler

LeBlanc hefur ekki uppfært Instagram-reikning sinn frá því að Perry lést, en síðasta færsla leikarans er hjartnæm minningarkveðja sem hann birti þann 23. nóvember í fyrra.