Kamala Harris, varaforseti og forsetaframbjóðandi, kom óvænt fram í geysivinsæla grínþættinum Saturady Night Live, eða SNL, í gærkvöldi og gerði grín að keppinaut sínum, Donald Trump.

Harris kom fram í upphafsatriði þáttarins ásamt Mayu Rudolph, sem hefur lengi hermt eftir Harris. Harris hefur sjálf deilt eftirhermum Rudolph á samfélagsmiðlum og talað um þær í viðtölum.

Þetta er í fyrsta sinn sem Harris kemur fram í SNL.

Í atriðinu þóttist Harris vera spegilmynd Rudolph er hún lék Harris. Áhorfendur fögnuðu ákaft er hún kom fram.

Harris þóttist vera spegilmynd Rudolph. AFP

Gerðu grín að Trump í ruslabílnum

Gerðu þær meðal annars grín að hlátri Harris og nýlegri mynd af Trump í ruslabíl þar sem hann datt næstum því er hann var að reyna komast inn í hann. Repúblikanar hafa lýst hlátri Harris sem nornahlátri. 

Frétt af mbl.is

„Hvernig finnst ykkur ruslabíllinn minn?“

Trump kom sjálfur fyrst fram í SNL árið 2004 og aftur fyrir kosningarnar árið 2016. 

Síðan þá hefur álit hans a þættinum súrnað. Í fyrra sagði hann þáttinn vera „slæma vöru, ekki fynda. Falskar fréttir“ á samfélagsmiðli sínum Truth social. Þá sagði hann SNL vera hluti af kosningabaráttu demókrata. 

SNL hefur oft tekið bæði Trump og Joe Biden Bandaríkjaforseta fyrir í grínatriðum sínum. 

Atriði Harris má sjá hér að neðan.