Ein dýrmætasta og tilfinningaþrungnasta stund í lífi feðra er þegar þeir fá að fylgja dætrum sínum inn kirkjugólfið á brúðkaupsdaginn, enda sannkölluð tímamótastund. Það gengur þó ekki alltaf snurðulaust fyrir sig, líkt og hjá föður brúðar í Yorkshire, eða Jórvíkurskíri eins og sagt er á góðri íslensku, nú á dögunum.

Faðirinn var eitthvað annars hugar þegar stóra stundin rann upp og gleymdi brúðinni. Hann gekk einsamall í átt að brúðgumanum áður en hann var sóttur og sendur til baka til að sækja dóttur sína sem stóð skellihlæjandi við hinn enda gangsins.

Allt fór þó vel og enduðu feðginin á að ganga samstiga inn kirkjugólfið við mikinn fögnuð gesta.

Myndskeið af atvikinu hefur farið sem eldur í sinu um samfélagsmiðla og fengið skemmtileg viðbrögð, enda stund sem gerir daginn án efa eftirminnilegri fyrir brúðhjónin, foreldra þeirra og aðra brúðkaupsgesti.