Kokkalandsliðið | 5. nóvember 2024

Gabríel fór á kostum í útgáfupartíinu

Gabríel Kristinn Bjarnason landsliðskokkur bauð í glæsilegt útgáfupartí í Hlégarði í tilefni þess að matreiðslubókin hans Þetta verður veisla er komin út. Fjölmargir komu og fögnuðu með Gabríel og þar mátti meðal annars sjá landsliðskokka og fleiri stór nöfn í veitingabransanum.

Gabríel fór á kostum í útgáfupartíinu

Kokkalandsliðið | 5. nóvember 2024

Landsliðskokkarnir Snædís Jónsdóttir, Wiktor Pálsson og Ísak Aron Jóhannsson fögnuðu með Gabríel Kr. Bjarnasyni en hann var að gefa út sína fyrstu matreiðslubók, Þetta verður veisla. Ljósmynd/Fermin Galeano

Gabríel bauð upp á fingramat sem borinn var fram á fallegum viðarbrettum sem eru einmitt táknræn í bókinni. Einnig eru uppskriftir af öllum réttunum sem hann bauð upp á að finna í bókinni. Kræsingarnar slógu í rækilega í gegn, heilluðu gestina upp úr skónum og fuðruðu upp af viðarbrettunum.

Girnilegir réttir og fallega framsettir. mbl.is/Sjöfn

Röff og töff

Matreiðslubókin er bæði röff og töff og stendur undir nafni. Í bókinni má finna frumlegar uppskriftir að smjöri og ídýfum, fingramat og veislupinnum, aðalréttum og eftirréttum.

Uppskriftirnar af öllum réttunum sem bornir voru fram er að finna í bókinni. mbl.is/Sjöfn

Klárlega matreiðslubókin fyrir þá sem vilja halda matarveislu heima og bjóða vinum og fjölskyldu heim í matarupplifun en vilja ekki hafa allt of mikið fyrir því.

„ Ég er afar glaður að bókin sé loksins komin á markað og vona svo sannarlega að hún hljóti góðar viðtökur. Byrjunin lofar alla vega góðu og gaman að sjá hve margir komu í hófið að fagna útgáfunni með mér og mínu fólki,“ segir Gabríel og brosir sínu breiðasta.