Hönnunarverðlaun Íslands fóru fram í Grósku í gær. Þar voru veitt verðlaun fyrir framúrskarandi hönnun og arkitektúr. Magnea Guðmundsdóttir arkitekt og Búi Bjarmar Aðalsteinsson vöruhönnuður voru kynnar hátíðarinnar og það var líkt og þau hefðu aldrei gert neitt annað en að vera sniðug og skemmtileg. 

Ullarpeysa vara ársins

Helga Lilja Magnúsdóttir fatahönnuður fékk verðlaun fyrir vöru ársins sem er peysan James Cook en peysuna hannaði hún í samvinnu við Stephan Stephensen listamann. 

Ný bygging Alþingis verðlaunuð

Studio Granda fékk verðlaun fyrir Smiðju, skrifstofubyggingu Alþingis. Eigendur Studio Granda eru Margrét Harðardóttir og Steve Christer. Þau eiga heiðurinn af mörgum fallegum byggingum sem prýða Ísland. 

Þykjó hreif börnin með sér 

Þykjó, sem er þverfaglegt hönnunarteymi, fékk verðlaun fyrir verkið Börnin að borðinu þar sem þau leituðu til barna til að endurskipuleggja svæðið í kringum Ásbrú í Reykjanesbæ. 

Teiknari allt sitt líf 

Gísli B. Björnsson teiknari fékk heiðursverðlaun ársins en hann hefur hannað þekktustu lógó landsins síðustu 50 árin eða svo. Hann kenndi auglýsingahönnun og grafíska hönnun í 50 ár og hafa verk hans sett svip á samtímann. Hann hannaði til dæmis lógó Sjónvarpsins og SS svo einhver séu nefnd. 

Krónan hlaut viðurkenningu fyrir bestu fjárfestingu í hönnun en fyrirtækið hefur fengið hönnuði að borðinu til þess að hanna vörur og varning til þess að auka upplifun kúnnans. 

„Það bygg­ist á ríku­legri hug­mynda­auðgi og fram­sýni í um­hverf­is­mál­um sem snýr m.a. að end­ur­vinnslu og ým­iss kon­ar nýt­ingu hliðar­af­urða og af­ganga,“ sagði í umsögn dómnefndar.