Halla Tómasdóttir, forseti Íslands, hefur ekki óskað Donald Trump, næsta forseta Bandaríkjanna, til hamingju með sigur hans í forsetakosningunum í Bandaríkjunum eins og hefð er fyrir.

Sif Gunnarsdóttir forsetaritari segir að til standi að gera það með formlegum hætti þegar Trump verður vígður í embætti í janúar.

„Hún mun senda formlegt heillaóskaskeyti þegar hann verður settur í embætti,“ segir Sif.

Bjarni Benediktsson forsætisráðherra og Þórdís Kolbrún R. Gylfadóttir utanríkisráðherra hafa óskað Trump til hamingju á samskiptaforritinu X, áður Twitter.

Frétt af mbl.is

„Sigurinn aðeins meira afgerandi en ég bjóst við“

Metið hverju sinni

Sif segir enga sérstaka hefð fyrir því hvernig heillaóskir eru sendar til þjóðarleiðtoga eftir sigur í kosningum.

„Það er ekki hefð fyrir því að senda heillaóskir á alla þjóðarleiðtoga í heiminum. Þetta er metið hverju sinni,“ segir Sif.

Frétt af mbl.is

Bjarni óskar Trump til hamingju

Ýmist tíst eða heillaóskabréf 

Guðni Th. Jóhannesson, fyrrverandi forseti Íslands, valdi aðra leið þegar Joe Biden sigraði í bandarísku forsetakosningum árið 2020. Þá óskaði hann Biden til hamingju á X. Hið sama gerði Katrín Jakobsdóttir, þáverandi forsætisráðherra. 

Þá sendi Guðni heillaóskaskeyti á Donald Trump eftir að hann var kjörinn árið 2016. Sigurður Ingi Jóhannsson, ráðherra og formaður Framsóknarflokksins, gerði hið sama.

Frétt af mbl.is

Sigurður Ingi óskar Trump til hamingju