Bandaríski leikarinn Chad Michael Murray, best þekktur fyrir hlutverk sitt í þáttaröðinni One Tree Hill á árunum 2003 til 2012, er þessa dagana á fullu við að kynna nýjustu mynd sína, The Merry Gentleman, sem líkja má við jólaútgáfu af Magic Mike.

Í tilefni myndarinnar gaf Murray, 43 ára, út dagatal með myndum af sér berum að ofan, sem heillar án efa ófáa einstaklinga sem tilheyra þúsaldarkynslóðinni.

Leikarinn frumsýndi myndirnar, allar tólf, í gærdag og er óhætt að segja að færslan hafi kveikt áhuga þó nokkurra, en hátt í 120.000 manns hafa líkað við færsluna á innan við sólarhring.

Margir telja dagatalið vera kynningarbrellu Netflix en fjölmargir aðdáendur Murray vilja ólmir næla sér í eintak, ef marka má athugasemdir.

The Merry Gentlemen verður frumsýnd á Netflix þann 20. nóvember næstkomandi.