Þrír flokkar virðast vera að taka ótvíræða forystu í baráttunni um sætin á Alþingi næstu fjögur árin. Þetta má lesa úr spá Metils (www.metill.is) sem byggir á kosningalíkani sem spáir fyrir um niðurstöðu kosninganna.

Fjallað er um líkanið og þær niðurstöður sem það gefur í nýjasta þætti Spursmála sem fór í loftið kl. 14:00 í dag. Þar er meðal gesta Brynjólfur Gauti Guðrúnar Jónsson, doktorsnemi í tölfræði við Háskóla Íslands sem heldur kosningalíkaninu úti ásamt þeim Agnari Frey Helgasyni, Hafsteini Einarssyni og Rafael Daniel Vias.

Umræður um líkanið og það sem það hefur að geyma má sjá í spilaranum hér að ofan.

Kristrún Frostadóttir, formaður Samfylkingarinnar, Þorgerður Katrín Gunnarsdóttir, formaður Viðreisnar og Bjarni Benediktsson, formaður Sjálfstæðisflokksins. mbl.is/samsett mynd

Þrír í fyrstu deild

Þar kemur meðal annars fram að þrír flokkar virðast vera að skilja sig frá öðrum í kapphlaupinu um þingsætin 63 sem útdeilt verður með nýjum hætti eftir kosningarnar 30. nóvember. Þar eru á ferðinni Samfylking, Viðreisn og Sjálfstæðisflokkur. 

Nýjasta kosningaspá Metils sem birt var 16. nóvember. metill.is/skjáskot

Dregur saman

Birtir líkanið nokkuð aðra mynd en þær kannanir sem birtar hafa verið að undanförnu því samkvæmt því er minni munur á Sjálfstæðisflokki og hinum flokkunum tveimur en kannanir hafa gefið til kynna. Samkvæmt efri mörkum virðast þessir flokkar ætla að skila í hús um 21-23% og neðri mörkin sýna 12-13%. Miðgildi útreikningsins á flokkunum þremur liggur á þröngu bili, 16-17%.

Nýjustu kannanir

Þegar líkanið er skoðað eins og það stóð 16. nóvember, í kjölfar þess að nýjustu kannanir höfðu birst sést að talsverð breyting hefur orðið á niðurstöðunni miðað við gögnin sem metill.is birti þann 8. nóvember. Talsvert dregur saman með flokkunum fyrrnefndu frá 8. nóvember þegar spálíkanið gaf síðast álit sitt á stöðu mála.

Stefán Einar, Eiríkur Bergmann og Brynjólfur Gauti rýna í spálíkanið hjá metill.is fyrir útsendingu þáttarins. mbl.is/María Matthíasdóttir

Í Spursmálum þennan þriðjudaginn er farið yfir líkanið en einnig rætt við Þorgerði Katrínu Gunnarsdóttur, formann Viðreisnar: