Talsmaður Barnahjálpar Sameinuðu þjóðanna segir að yfir 200 börn hafi verið drepin í Líbanon á innan við tveimur mánuðum eftir að Ísraelar hertu árásir sínar á Hisbollah-samtökin.

„Þrátt fyrir að meira en 200 börn hafi verið drepin í Líbanon á innan við tveimur mánuðum hefur óhugnanlegt mynstur komið í ljós. Dauðsföllum þeirra er mætt með tregðu frá þeim sem geta stöðvað þetta ofbeldi,“ sagði James Elder, talsmaður Barnahjálpar Sameinuðu þjóðanna, UNICEF, við fréttamenn.

Frétt af mbl.is

Skólum lokað í Beirút

Hann segir að síðustu tvo mánuði hafi að meðaltali þrjú börn verið drepin í Líbanon á degi hverjum og á annað þúsund hafi særst og hafi orðið fyrir áföllum.

Hisbollah-samtökin hófu eldflaugaárásir á Ísrael í október á síðasta ári til stuðnings vígasamtökunum Hamas á Gasa. Frá því í september síðastliðinn hafa Ísraelar staðið fyrir umfangsmiklum sprengjuherferðum í Líbanon þar sem þeir hafa beint árásum sínum á vígi Hisbollah.

Frétt af mbl.is

Talsmaður Hisbollah drepinn

Yfirvöld í Líbanon segja að 3.500 hafi fallið í Líbanon eftir að átökin brutust út.