Hraun fór yfir Grindavíkurveg um hálffimmleytið í nótt á svipuðum slóðum og það hefur áður farið yfir veginn.

Frétt af mbl.is

Verulegar líkur á að hraun renni yfir veginn

Hraunið heldur áfram í vesturátt. Síðustu klukkustundina skreið hraunið áfram 300 til 350 metra vegalengd, að sögn Minneyjar Sigurðardóttur, náttúruvársérfræðings hjá Veðurstofu Íslands.

Hraunið stefnir í átt að Njarðvíkurlögninni og klukkan 6 í morgun var það tæplega 600 metra frá henni. Minney segir að það líti út fyrir að hraunið nái þangað nema að það stöðvist á næstu klukkustund.

Frétt af mbl.is

Augu almannavarna á mikilvægum innviðum

Dregið úr virkni 

„Þessi þriggja kílómetra gossprunga sem var virk í byrjun gossins hefur dregist saman og er mest virk í miðpartinum á henni,“ segir Minney. „Það hefur dregið úr bæði í suður- og norðurpartinum, þannig að það hefur dregið úr gosinu en það er áfram virkt og gýs ennþá.“

Hún segir gosið mun minna en síðustu tvö gos.

mbl.is/Eyþór

Spurð hvort það muni reyna á varnargarða kveðst hún ekki telja það en að það gæti þó breyst.

Veðurstofan og viðbragðsaðilar vakta svæðið.

Engin gosmengun í byggð

Gas mælist alveg við gosið en núna er engin gosmengun í byggð. Gasdreifingaspáin sýnir annars dreifingu í suðsuðvestur.

Veðurstofan fundar með morgninum og er von á fréttatilkynningu upp úr klukkan 10 með nýjustu hraunlíkönum meðal annars.

Uppfært kl. 6.50:

Fram kemur í tilkynningu frá Veðurstofu Íslands að hraunflæði úr eldgosinu haldi áfram til vesturs og norðurs.

Nyrðri hrauntungan rennur ekki í átt að neinum innviðum en vestari hrauntungan, sú sem rennur milli Sýlingarfells og Stóra Skógfells og rann yfir Grindavíkurveginn í nótt, nálgast Njarðvíkuræð.