Gjald á fiskeldi hækkar um 19% um áramótin og mun gjald verða 45,03 krónur á hvert kíló slátraðs lax og 22,52 krónur á hvert kíló slátrað regnbogasilungs, að því er fram kemur í tilkynningu á vef Fiskistofu.

Gjaldið hefur hækkað verulega frá því að innheimta hófst og hefur það hækkað um 2.308% frá árinu 2020 í tilfelli lax og 2.296% í tilfelli regnbogasilungs.

Fiskistofa leggur gjaldið á tvisvar á ári. Fyrst 15. ágúst vegna tímabilsins 1. janúar til til 30. júní og svo 15. febrúar vegna tímabilsins 1. júlí til 31. desember.

Uppfært 5.12.24 klukkan 07:45: Upphaflega sagði að gjaldið hefði hækkað úr 30,77 krónum í 45,03 krónur í samræmi við tilkynningu á vef Fiskistofu. Sú tilkynning hefur hins vegar verið fjarlægð. Rétt er að að gjaldið hækkar úr 37,8 krónum fyrir lax 2024 og úr 18,9 krónum fyrir regnbogasilung. Fréttin hefur verið leiðrétt mep tilliti til þessa.