Keppni um Brauð ársins 2025 var haldin í Hótel- og matvælaskólanum í Kópavogi, fimmtudaginn 21. nóvember síðastliðinn. Hlutskörpust að þessu sinni var Natasja Keincke hjá Bakarameistaranum en brauðið hennar er kaldhefað heilhveitisúrdeigsbrauð með ekta íslenskum cheddarosti og jalapeno, sem kitlar bragðlaukana eins og fram kom í umsögn dómnefndar.

Í öðru sæti var brauð Andra Más Ragnarssonar hjá Bakarameistaranum en það er hrísgrjóna súrdeigsbrauð sem inniheldur m.a. hrísgrjón, kartöflumús og kardimommur. Þriðja sætið hreppti Sigrún Sól Vigfúsdóttir, einnig hjá Bakarameistaranum, með Sælkerabrauðið sitt. Er það gerbrauð með steiktum lauk, papriku og semi þurrkaða tómata, rúllað upp í kornflakes og ostablöndu.

Brauðin þrjú sem skipuðu þrjú efstu sætin. Ljósmynd/Sigurður Helgi Birgisson

Mjög hörð og jöfn keppni

Keppnin var mjög hörð og jöfn þetta árið en alls voru sex ólík en frambærileg brauð send til leiks. Dómnefnd stóð í ströngu við að greina á milli brauða en dæmt var út frá útliti, bragði, nýbreytni, samsetningu og innihaldi.

Dómnefnd skipuðu þau Eliza Reid, fyrrverandi forsetafrú, Sjöfn Þórðardóttir, umsjónarmaður Matarvefs mbl.is, og Stefán Bachman, fagkennari í bakaraiðn við Hótel og matvælaskólann. Dómnefndin var afar ánægð með þátttakendur og hafði orð á því að valið hafi verið afar erfitt en Brauð ársins sé svo sannarlega vel að sigrinum komið.

Sigurður Már Guðjónsson formaður LABAK afhendi verðlaunin og sagði við það tækifæri að það væri ánægjulegt að keppnin um brauð ársins væri að festa sig í sessi líkt og kaka ársins.

Brauð ársins 2025 er með ekta íslenskum cheddar osti og jalapeno. mbl.is/Sjöfn

Brauð ársins fer í almenna sölu í bakaríum innan Landssambands bakarameistara, LABAK, á bóndadaginn þann 24. janúar næstkomandi á nýju ári.