Grunndeild Hótel- og matvælaskólans í Kópavogi hélt sína árlegu Kökukeppni í byrjun nóvember. Keppnin, sem nú var haldin í fjórða sinn, hefur vaxið í vinsældum og kökusköpun nemenda orðið sífellt tilkomumeiri. Nemendur og starfsmenn skólans tóku þátt í dómnefnd og kusu kökurnar eftir útliti og hugmyndaflugi.

Vinningshafar keppninnar í ár voru Lilja Karen Jóhannsdóttir í fyrsta sæti með 14 atkvæði af 40 mögulegum, Júlía Blasik í öðru sæti með 11 atkvæði og Þorgerður Þórðardóttir í þriðja sæti með 10 atkvæði. Allir keppendur bjuggu til kökubotna eftir leiðbeiningum en fengu frjálsar hendur við skreytingu. Skilyrði var að öll skrautefni væru æt, sem gaf nemendum tækifæri til að vera skapandi og láta hugmyndaflugið ráða ferðinni. Að keppni lokinni fengu nemendurnir kökurnar sínar með sér heim, og var vafalítið boðið upp á góða kökubita þar.

Gullfalleg sigurkakan hjá Lilju Karen. Skilyrðin í keppninni voru að öll skrautefni væru æt, sem gaf nemendum tækifæri til að vera skapandi og láta hugmyndaflugið ráða ferðinni. Ljósmynd/Árni Þorvarðarson

Þessi dýrðlega terta hlaut annað sætið. Ljósmynd/Árni Þorvarðarson

Þessi terta skartaði þriðja sætinu. Ljósmynd/Árni Þorvarðarson

Glæsilegur hópur þátttakenda skilaði inn kökum sem sýndu vel metnaðinn sem býr í hópnum. Ljósmynd/Árni Þorvarðarson

Bakstur hefð í íslenskri menningu

„Bakstur hefur lengi verið hluti af íslenskri menningu og arfleifð, og viðburðir eins og kökukeppnin veita nemendum tækifæri til að þróa þessa listgrein enn frekar. Fyrir marga er bakstur meira en bara uppskriftir og hráefni – það er skapandi ferli þar sem unnið er með áferð, lit og bragð til að skapa upplifun sem gleður bæði auga og bragðlauka,“ segir Árni Þorvarðarson bakari og fagstjóri við Hótel- og matvælaskólann.

Í kökukeppninni fengu nemendur tækifæri til að spreyta sig á þessum þætti bakstursins, þar sem þeim var frjálst að skreyta kökurnar eftir sínu eigin höfði.

„Ég held að ég hafi aldrei farið á Michelin-veitingastað. Þyrfti að taka góðan þannig í Þýskalandi eða á

„Þetta frjálsræði gerir þeim kleift að þroska hæfileika sína og finna sinn eigin stíl í bakstrinum. Íslendingar hafa löngum verið þekktir fyrir heimabakstur á stórhátíðum og við sérstök tilefni, og núna fá þessir ungu nemendur tækifæri til að byggja á þeim hefðum en um leið að þróa nýjar og skapandi leiðir til að tjá sig í gegnum bakstur,“ segir Árni enn fremur.

Glæsilegar tertur sem ungu nemendurnir töfruðu fram. Ljósmynd/Árni Þorðvarðarson

Grunnbraut fyrir framtíðina

Grunnbraut í matvæla- og ferðagreinum, sem er á fyrsta þrepi, er tveggja anna nám með 63 einingum. Námið hentar 16-18 ára nemendum sem stefna á frekara nám í matvæla- og ferðagreinum.

„Með blöndu af bóklegum og verklegum greinum fá nemendur góða undirstöðu í faggreinum ásamt grunnfögum í íslensku, ensku og stærðfræði. Þeir sem ljúka fyrsta þrepi geta haldið áfram á annað þrep eða valið að sérhæfa sig enn frekar,“ segir Árni.

„Nemendur fá einnig raunhæfa reynslu í starfsnámi á vinnustöðum að eigin vali og njóta styttingar á verknámi þegar þeir halda áfram í iðnnám. Það eru forréttindi að fylgjast með þessu unga og hæfileikaríka fólki vaxa í námi og blómstra í framtíðinni, hvort sem það verður á sviði baksturs, matreiðslu, kjötiðnaðar, framreiðslu eða ferðamálatækni. Þessi viðburður sýnir metnað ungs fólks og gleður bragðlaukana í leiðinni,“ bætir Árni við.

Björt framtíð fyrir matvæla- og ferðagreinar

„Framtíðin er björt fyrir ungt fólk sem velur matvæla- og ferðagreinar, enda bjóða þessar greinar upp á fjölbreytta möguleika til starfsframa og skapandi vinnu. Matvælaiðnaðurinn er í örri þróun með nýjungum á sviði matartækni og sjálfbærni, auk aukins áhuga á handverksbakstri og staðbundinni framleiðslu. Einnig eykst eftirspurn eftir hæfu fólki sem getur skapað einstaka upplifun fyrir ferðamenn, hvort sem er á veitingahúsum eða með leiðsögn í íslenskri náttúru,“ segir Árni en hann hefur fundið fyrir miklum áhuga á þessum greinum síðustu misseri og nám á þessu sviði er í sókn.

Grunnnámið veitir sterkan grunn fyrir frekara nám, hvort sem það er í iðngreinum eða á háskólastigi. Þeir sem ljúka grunnnámi hafa möguleika á að þróa eigin hugmyndir og jafnvel stofna sitt eigið fyrirtæki. Með skapandi hugsun, sjálfstæði og tæknilegri þekkingu geta þeir orðið leiðandi í verkefnum sem byggja á sjálfbærum lausnum og nýtingu íslenskra hráefna.

„Áhugi ungra Íslendinga á matvæla- og ferðamennsku sýnir að við eigum hæfileikaríka kynslóð sem er tilbúin að leggja sitt af mörkum til að móta framtíðina, þar sem hefðir og nýsköpun mætast. Skólinn veitir nemendum nauðsynleg verkfæri til að mæta framtíðinni með sjálfstrausti, sköpunargleði og metnaði, og þannig munu þeir blómstra á sínu sviði og leggja sitt af mörkum til samfélagsins með fjölbreyttum hætti,“ segir Árni að lokum og horfir björtum augum til framtíðarinnar.