SVEIT, samtök fyrirtækja á veitingamarkaði, hafnar alfarið þeim ásökunum um að verið sé að brjóta á lögbundnum rétti starfsfólks með samningnum.

Þvert á móti eru dagvinnulaun að hækka meira en Efling náði fram í Stöðugleikasamningnum.

Þetta kemur fram í tilkynningu frá SVEIT sem undirrituð er af Aðalgeiri Ásvaldssyni, framkvæmdastjóra SVEIT sem send var út fyrir skemmstu. Er þar svarað ásökunum Eflingar um að vegið sé að kjörum starfsmanna í veitingageiranum í gegnum nýtt stéttarfélag er nefnist Virðing. 

Frétt af mbl.is

Segir launatapið 52 þúsund krónur

Hafi reynt að gera samning við Eflingu 

„Í ljósi málflutnings Eflingar í fjölmiðlum er vert að taka fram að allt frá stofnun SVEIT hafa samtökin, sem eru stærstu hagsmunasamtök fyrirtækja á veitingamarkaði, haft það markmið að gera kjarasamning við Eflingu. Meðal annars farið svo langt að leita til félagsdóms,“ segir í tilkynningu. 

Segir enn fremur að óskum SVEIT um kjaraviðræður við Eflingu hafi verið hafnað.

„Ef vilji Eflingar er sá að eiga samningaviðræður standa dyr SVEIT sannarlega opnar. SVEIT kýs eftir sem áður að taka ekki þátt í þeirri neikvæðu orðræðu og átökum sem hafa einkennt málflutning Eflingar undanfarin ár í garð veitingareksturs á Íslandi.“

Segir að hinn nýi kjarasamningur sem gerður hefur verið á milli Virðingar og SVEIT til fjögurra ára hafi verið nauðsynlegt skref í átt að stöðugleika og bættri samkeppnishæfni, jafnt fyrir fyrirtæki og starfsmenn.

Laun hækki um 3% umfram Eflingartaxta

„Með samningnum hækka grunnlaun í veitingarekstri um 3% ofan á grunntaxta Stöðugleikasamningsins. Fyrir liggja mörg dæmi um samskonar grundvallarbreytingar og samningur SVEIT og Virðingar kveður á um. Þau eru m.a. að finna í fyrirtækjaþætti Stöðugleikasamningsins og nýs kjarasamnings faglærðra í greininni,“ segir í tilkynningu. 

„Fyrir liggur að SVEIT hefur gert löglegan kjarasamning við skráð stéttarfélag og hafnar alfarið þeim ásökunum um að verið sé að brjóta á lögbundnum rétti starfsfólks með samningnum. Þvert á móti eru dagvinnulaun að hækka meira en Efling náði fram í Stöðugleikasamningnum.“