Það vakti mikla athygli þegar einkaþjálfarinn Guðmundur Emil Jóhannsson, betur þekktur sem Gummi Emil, gekk nakinn eftir Suðurlandsvegi í haust með þeim afleiðingum að lögreglan þurfti að hafa afskipti af honum. Gummi Emil var á sveppaferðalagi sem fór úr böndunum þegar atvikið átti sér stað. Hann er gestur í hlaðvarpsþættinum Veislan en í þættinum lýsir hann atvikinu sem því allra versta sem hann hafi upplifað á ævinni. 

„Ég var handjárnaður við rúmið. Allt vald var tekið af mér,“ sagði Gummi Emil í þættinum. „Ég var bara að reyna að losna og gæti ekki haft stjórn á neinum aðstæðum þarna. Öskraði eins hátt og ég gat af því þetta var bara ömurleg lífsreynsla,“ segir hann. 

Hann lýsti því hvernig hann var færður af lögreglu eftir að hafa misst stjórn á sér.

„Það var endalaust af einhverju liði þarna, átta lögreglumenn búnir að setja mig í gólfið. Ég á rassinum, með typpið í gólfið og hendur fyrir aftan bak,“ segir Gummi Emil. 

Var ekki viss um í hvaða heimi hann var

Gummi Emil segist ekki hafa vitað í þennan heim eða annan. 

„Hvaða fólk er þetta – af hverju er ég hérna? Ég vissi ekki að ég væri í þessum heimi,“ segir hann. Hann segist hafa streist á móti en áttað sig á því á endanum að lögreglan væri þarna og hún væri að fara með hann á spítala.

„Síðan var ég bara að öskra og öskra þangað til ég lokaði augunum, þá sá ég krossinn. Ókei, þá gefst ég bara upp,“ segir hann. 

Guðmundur Emil er reynslunni ríkari eftir atvikið og segist hafa lært mikið af reynslunni þótt hann mæli alls ekki með því að fólk upplifi slíkt. 

Hér fyrir neðan er hægt að hlusta á Veisluna sem er umsjón Gústa B. Guðrúnar Svövu og Sigurðar Gísla Bond: