Efling þvertekur fyrir fullyrðingar Virðingar um að gildandi kjarasamningur Eflingar við hótel og veitingastaði sé ekki sniðinn að starfsumhverfi veitingastaða. Virðing reyni að blekkja fjölmiðla og almenning.

Virðing, sem hefur verið nefnt „gervistéttarfélag“ stofnað af atvinnurekendum, hefur setið undir þungri gagnrýni verkalýðshreyfingarinnar síðustu daga eftir að Efling sakaði félagið um að brjóta á launafólki.

Virðing er sögð vera stofnuð af fólki úr röðum SVEIT, samtökum fyrirtækja í veitingaþjónustu, sem hafi síðan skrifað undir samning við „gervistéttarfélagið“ sem feli í sér verri kjör fyrir starfsfólk í veitingarekstri.

Frétt af mbl.is

Boðaðar aðgerðir Eflingar „fordæmalausar“

Efling sendi fyr­ir­tækjum bréf vegna kjara­samn­ings SVEIT við Virðingu og hefur nú fimmtungur þeirra fyrirtækja skráð sig úr sam­tök­un­um að sögn Eflingar. Þá hafi enn fleiri fyr­ir­tæki lýst því að þau muni fylgja kjara­samn­ing­um Efl­ing­ar og Sam­taka at­vinnu­lífs­ins.

SVEIT hafa nú ákveðið að taka til end­ur­skoðunar kjara­samn­inga þá sem í gildi eru við stétt­ar­fé­lagið Virðingu.

Frétt af mbl.is

Engin heiðvirð manneskja vilji kenna sig við samtökin

Samningurinn við lýði um margra ára skeið

Virðing hélt því fram í yfirlýsingu í dag að kjarasamningur Eflingar væri ekki sniðinn að starfsumhverfi veitingastaða.

„Þetta er rangt,“ segir Efling í yfirlýsingu sem send var á fjölmiðla síðdegis í dag. „Hið rétta er að í gildi er kjarasamningur milli Eflingar og Samtaka atvinnulífsins fyrir starfsfólk hótela og veitingastaða, í daglegu tali nefndur hótel- og veitingasamningurinn.“

Umræddur kjarasamningur var undirritaður 7. mars á þessu ári, sem hluti Stöðugleika- og velferðarkjarasamningsins 2024–2028, og samþykktur í atkvæðagreiðslu félagsfólks í Eflingu, sem vinnur samkvæmt samningnum.

Stéttarfélagið bendir þannig á að hótel- og veitingasamningurinn sé ekki nýr af nálinni, heldur hafi hann verið við lýði um margra ára skeið. Þar sé sérstaklega fjallað um starfsumhverfi veitingastaða, vinnutíma og kjör.

Samningurinn er birtur á vefsíðu Eflingar, sem og launatöflur. Þá hefur Efling birt samanburð á kjarasamningi Virðingar við SVEIT og á hótel- og veitingasamningnum.

Annaðhvort blekking eða víðtækt þekkingarleysi

„Það vekur því furðu að forsvarsfólk gervifélagsins Virðingar láti nú í yfirlýsingu eins og kjarasamningur Eflingar og SA vegna starfsfólks á hótelum og veitingahúsum sé ekki til,“ segir í yfirlýsingu Eflingar.

„Annað hvort er hér um markvissa tilraun til blekkinga að ræða af hálfu Virðingar eða víðtækt þekkingarleysi,“ segir þar enn fremur. Hvoru tveggja sé mjög alvarlegt.

„Ef Virðing er vísvitandi að reyna að blekkja fjölmiðla og almenning er það skammarleg og ósiðleg framganga. Ef forsvarsfólk Virðingar á hinn bóginn þekkir ekki til hótel- og veitingasamningsins er það háalvarlegt í ljósi þess að fyrir félaginu fer fólk sem rekur veitingahús. Sem aftur sýnir ljóslega að Virðing er ekki raunverulegt stéttarfélag heldur gervistéttarfélag.“

Að öðru leyti ítrekar Efling allan fyrri málflutning sinn varðandi „gervistéttarfélagið“ Virðingu og „svikasamning“ þess við SVEIT, segir að lokum í yfirlýsingunni.

Frétt af mbl.is

„Kalla yfir sig stríð“ ef félagið starfar áfram