Hundruð Sýrlendinga komu saman í dag til að minnast aðgerðarsinnans Mazen al-Hamada sem fannst látinn í nágrenni við höfuðborgina Damaskus í kjölfar þess að Bashar al-Assad, forseti landsins, hrökklaðist frá völdum. 

Hamada hafði í mörg ár mótmælt Assad-stjórninni og hafði í tvígang verið fangelsaður undir stjórn Assads. Fyrra skiptið var árið 2011 þegar arabíska vorið braust út í landinu. Þremur árum síðar tókst honum að flýja Sýrland og leitaði hann hælis í Hollandi. 

Hann sneri þó óvænt aftur til Sýrlands árið 2020 og var handtekinn við komuna til Damaskus og fangelsaður. 

Fjölda fólks kom saman til að minnast Hamada. AFP/Sameer Al-Doumy

Báru ummerki um pyntingar

Í vikunni fundust lík rúmlega 30 manna í líkhúsi sjúkrahúss í úthverfi Damaskus og báru mörg þeirra ummerki um pyntingar. Hamada var einn á meðal þeirra. 

„Ég hafði samtal við lækni og sendi honum myndskeið og mynd. Hann sagði mér að hann [Hamada] hefði verið tekinn af lífi fyrir um tíu dögum,“ sagði systir Hamada í samtali við AFP-fréttastofuna. 

Systir Hamada syrgir bróður sinn. AFP/Sameer Al-Doumy

Á meðan Hamada dvaldi í Hollandi talaði hann ítrekað opinberlega um þær pyntingar sem hann varð fyrir í fangelsinu í Sýrlandi. Sagði hann Assad-stjórnina hafa meðal annars eyðilagt æsku hans. 

Samkvæmt upplýsingum frá Sýrlensku mannréttindavaktinni hafa í kringum 60 þúsund manns látið lífið af völdum pyntinga eða vegna fangelsisvista í fangelsum undir stjórn Assads síðan að borgarastyrjöld, sem er gjarnan kennd við arabíska vorið, braust út í Sýrlandi árið 2011.