Lagning nýs Grindavíkurvegar er vel á veg komin og er stefnt að því að opna hann um helgina.

Þetta segir Úlfar Lúðvíksson, lögreglustjóri á Suðurnesjum, í samtali við mbl.is en hraun fór yfir veginn í síðasta eldgosi í Sundhnúkagígaröðinni sem hófst 20. nóvember og lauk á mánudaginn.

Frétt af mbl.is

Leggja nýjan veg í gegnum glóandi hraunið

„Stefnan hefur verið tekin á að klára verkið fyrir helgina og þá opnast þessar leiðir til og frá Reykjanesbraut,“ segir Úlfar.

Úlfar segir að svipaður fjöldi dvelji í bænum á hverri nóttu eða í um 50 húsum og þá hófst starfsemi á nýjan leik í Bláa lóninu á föstudaginn eftir rúmlega tveggja vikna lokun. Gestir lónsins safnast saman í Grindavík og þeim er þaðan ekið í skutlum á staðinn.

Frétt af mbl.is

„Kveðjustundirnar eru farnar að verða erfiðari“

Úlfar Lúðvíksson, lögreglustjóri á Suðurnesjum. mbl.is/Kristinn Magnússon

„Ég hef ekki heyrt annað en að það hafi gengið vel fyrir sig,“ segir lögreglustjórinn.

Frétt af mbl.is

Bláa lónið opið á ný: Gestir ferjaðir frá Grindavík

Spurður hvort hafi verið meiri umferð í Grindavík eftir goslokin segir hann:

„Það er ekki önnur umferð heldur en sú sem snýr að Bláa lóninu,“ segir hann. Úlfar segir ekki mikið um túrista nema þá sem gera sér ferð í lónið og dvelji á Northern Light Inn hótelinu.

„Það hefur verið eitthvað um túrista sem ganga frá bílastæðinu að Fagradalsfjalli en það dregur úr áhuga þeirra þegar gosi lýkur. Það hafa ekki verið nein vandamál með þessa túrista,“ segir Úlfar.

Vinna við varnargarða heldur áfram

Úlfar segist ekki hafa spurnir af ferðum ókunnugra í hús sem ekki er búið í en Öryggismiðstöðin sinnir ákveðnu eftirliti í bænum ásamt lögreglu.

Úlfar segir að vinna sé enn í gangi við að stækka og styrkja varnargarða við Svartsengi og það ríði á að verja orkuverið ef svo fari að áttunda gosið síðan í nóvember á síðasta brjótist út. Skýr merki eru um að landris á Svartsengissvæðinu sem bendir til þess að kvikusöfnun undir svæðinu sé hafin á ný.

Frétt af mbl.is

„Þetta eru bara jaxlar“