Stefnuyfirlýsing nýrrar ríkisstjórnar og skipan ráðherra verður kynnt á blaðamannafundi klukkan 13 í Hafnarborg í Hafnarfirði á morgun.

Þetta kemur fram í tilkynningu frá aðstoðarmanni Kristrúnar Frostadóttur, formanns Samfylkingarinnar. 

Þar segir einnig að gert sé ráð fyrir lyklaskiptum á sunnudaginn.

Frétt af mbl.is

Kristrún Frostadóttir verður forsætisráðherra

Ríkisráðsfundir verða haldnir á Bessastöðum á morgun. Klukkan 15 hefst fundur fráfarandi starfsstjórnar.

Fyrsti ríkisráðsfundur nýrrar ríkisstjórnar hefst klukkan 16.30.

Þingflokkar funda

Þingflokkar Samfylkingar, Viðreisnar og Flokks fólksins funda í fyrramálið fyrir blaðamannafundinn vegna nýs stjórnarsáttmála flokkanna.

Kristrún Frostadóttir, sem leitt hefur stjórnarmyndunarviðræðurnar, verður forsætisráðherra í nýrri ríkisstjórn.

Þorgerður Katrín Gunnarsdóttir, formaður Viðreisnar, hefur verið orðuð við fjármálaráðuneytið og utanríkisráðuneytið.

Inga Sæland, formaður Flokks fólksins, hefur verið orðuð við félagsmálaráðuneytið.