„Mér líst mjög vel á þetta, samhentur hópur, öflugur hópur. Ég er ánægður með stefnuyfirlýsingu stjórnarinnar. Hún er ekki eins ítarleg og oft áður og mér finnst að það eigi að vera þannig,“ segir Össur Skarphéðinsson fyrrverandi ráðherra og þingmaður Samfylkingarinnar að loknum flokksstjórnarfundi Samfylkingarinnar.

Tekur hann sérstaklega fram ánægju sína með að Evrópumálin hafi ekki gleymst í stefnuyfirlýsingunni.

„Ég átti ekki von á því að þau færu svo langt að boða það að það yrði þjóðaratkvæðagreiðsla en ég fagna því auðvitað, gamall Evrópusinni,“ segir Össur.

Frétt af mbl.is

Skiptir máli að öll geti fundið sig í sáttmálanum

Kristrún uppáhald, eftirlæti og augasteinn flokksins

Að sögn Össurar var farið yfir stefnuyfirlýsinguna og einstaka atriði hennar ásamt því að kynna nýja ráðherra. 

„Svo þurfti að klappa talsvert vel fyrir Kristrúnu. Hún er náttúrulega uppáhald og eftirlæti og augasteinn flokksins í dag. Enda má segja það að hún á þetta svikalaust nánast ein að hafa náð flokknum upp í þessar miklu hæðir,“ segir hann.

Tekur hann einnig fram að hún þurfi að fá mikið svigrúm til sinna verka. Fjölmiðlar muni verða gagnrýnir á ríkisstjórnina því þannig sé lýðræðið.

„Þá skiptir máli að svona gamlir jaxlar eins og ég og Einar Karl Haraldsson að við stöndum þétt við bakið á þessu unga fólki.“

Fréttin hefur verið uppfærð.

Frétt af mbl.is

Beint: Ný ríkisstjórn tekin við völdum