Skipulagsfulltrúi Reykjavíkur hafði tekið jákvætt í fyrirspurn um málið í ágúst 2023.

Er þetta samkomulag í samræmi við stefnu í aðalskipulagi um uppbyggingu og umbreytingu iðnaðar- og verslunarhverfis í blandaða byggð, sem þjónað verði með hágæða almenningssamgöngum og öðrum vistvænum fararmátum eins og það er orðað.

Hér er horft til norðvesturs frá Skeifunni. Byggingarnar umlykja skjólgóðan garð. Tölvumyndir/Kanon arkitektar

Í rammaskipulagi Skeifunnar er gert ráð fyrir 750 nýjum íbúðum á svæðinu og um 190 þúsund fermetrum undir verslun og þjónustu. Miðað við þær forsendur þurfi bílastæði að verða um 2.000 talsins á Skeifusvæðinu.

Uppbygging í Skeifunni og nágrenni er hafin fyrir nokkru, t.d. á Orkureit og Grensásvegi 1. Áformað er að hefja uppbyggingu á fleiri reitum. Til að mynda hafa verið kynntar hugmyndir að íbúðabyggð á lóðinni Suðurlandsbraut 56. Á lóðinni stendur 715 fermetra veitingahús sem upphaflega var reist fyrir hamborgarastaðinn McDonalds en hýsir nú veitingastaðinn Metro.

Húsin sem víkja. Skeifan 7 (rautt) þar sem Elko var með verslun um árabil og Skeifan 9 (nær) þar sem Bílaleiga Akureyrar var lengi með höfuðstöðvar.

Á lóðunum tveimur viið Skeifuna standa nú tvö hús sem þurfa að víkja. Í Skeifunni 7, reist 1967, var Elko með verslun um árabil en henni var lokað og ný verslun opnuð á öðrum stað í hverfinu. Og í Skeifunni 9, reist 1979, var Bílaleiga Akureyrar með höfuðstöðvar þar til þær voru fluttar í Skútuvog fyrir nokkru. Samanlögð stærð húsanna sem rifin verða er 5.775 fermetrar.

Í bréfi skrifstofu borgarstjóra og borgarritara, dags. 2. desember 2024, sem lagt var fyrir borgarráð, kemur fram að í vinnslu sé nýtt deiliskipulag fyrir lóðirnar. Gert er ráð fyrir niðurrifi á byggingum sem fyrir eru á lóðunum sökum lélegs ástands þeirra. Deiliskipulagstillagan er unnin af Kanon arkitektum.

Nánari umfjöllun er að finna í Morgunblaðinu sem kom út fimmtudaginn 19. desember.