Björgunarsveitir Slysavarnarfélagsins Landsbjargar þurftu að sinna nokkrum verkefnum í nótt vegna veðurs en slagveður gekk yfir sunnan- og vestanvert landið í nótt og fram undir morgun.

Frétt af mbl.is

„Nánast aftakaveður þegar hryðjurnar ganga yfir“

Að sögn Jóns Þórs Víglundssonar, upplýsingafulltrúa Landsbjargar, kom fyrsta útkallið klukkan hálf þrjú í nótt í Snæfellsbæ. Óskað var eftir aðstoð Björgunarsveitarinnar Lífsbjargar í Snæfellsbæ en fólk lenti í vandræðum við Ólafsvík. Hann segir að björgunarsveitin hafi farið á einum bíl til að sækja fólkið sem varð að skilja bíl sinn eftir þar sem ekki var hægt að aka honum.

Í Svínahrauni var óskað eftir aðstoð þar sem bíll var fastur í snjó en vegfarendum sem áttu leið um tókst að losa bílinn og var aðstoð björgunarsveitar afturkölluð. Þá voru tveir hraktir í bíl á Þingvallavegi við Leirvogsvatn í vandræðum en björgunarsveit sem kom á staðinn tókst að losa bílinn úr snjó.

Frétt af mbl.is

Veðurspáin mjög slæm: Ökumenn fari varlega

Í Vogum var óskað eftir aðstoð þar sem þakkantur var að losna af húsi og sama var uppi á teningnum í Grundarfirði. Á Akranesi losnuðu þakplötur og stillansar við byggingu í bænum.