Volodimír Selenskí Úkraínuforseti fordæmir árásir Rússa á úkraínska orkuinnviði á jóladag.

Úkraínumenn vöknuðu í morgun er loftvarnarflautur fóru í gang klukkan 5.30 á staðartíma (3.30 að íslenskum tíma).

Skömmu síðar bárust fréttir af því að Rússar hefðu skotið Kalibr-eldflaugum á loft frá Svartahafi.

„Pútín valdi jólin vísvitandi til árása. Hvað gæti verið ómannúðlegra? Yfir 70 flugskeyti og yfir hundrað drónar. Skotmarkið er orkukerfið okkar,“ segir Selenskí.

Frétt af mbl.is

Segja Norður-Kóreumenn hafa haft lítil áhrif

Skutu í gegnum moldóvska og rúmenska lofthelgi

Árásin var 13. stóra árásin á raforkukerfi Úkraínu á þessu ári.

Ein eldflauganna fór í gegn moldóvska og rúmenska lofthelgi að sögn Andrí Síbiga, utanríkisráðherra Úkraínu. Fordæmir hann árásirnar og kallar þær „jólahrylling“

Að sögn Selenskís skaut úkraínski flugherinn fleiri en 50 flugskeyti niður. Segir hann að einhver flugskeyti hafi náð skotmörkum sínum. 

Að minnsta kosti einn lést og er rafmagnslaust á stóru svæði í landinu.

Frétt af mbl.is

Sammála um að koma þurfi á „varanlegum friði“

Rússneska illskan eyðileggi ekki jólin

Úkraína heldur jólin formlega 25. desember í annað sinn í ár. Í fyrra færði ríkisstjórn landsins jólin, sem áður voru haldin 7. janúar, þegar flestir rétttrúnaðarmenn halda hátíðina.

Að siðvenju hafa jóla­hátíðar­höld Úkraínu­manna fylgt júlí­anska tíma­tal­inu, sem og Rússa, þar sem jól­in eru hald­in þann 7. janú­ar.

Til þess að aðskilja sig enn meir frá Rússlandi tóku Úkraínumenn upp vest­ræna hefð og halda nú jól­in sam­kvæmt greg­oríska tíma­tal­inu, þar sem jóla­dag­ur fell­ur á 25. des­em­ber hvers árs.

„Rússneska illskan mun ekki brjóta Úkraínu niður og mun ekki eyðileggja jólin,“ segir Selenskí.