Björgunarsveitir eru nú á leiðinni á Vatnsskarð til þess að aðstoða ökumenn um 20 bifreiða sem eru þar í vanda.

Búið er að loka Vatnsskarði og Holtavörðuheiði, að því er fram kemur á vef Vegagerðarinnar.

Skítaveður er frá Vatnsskarði og austur eftir, inn að Hofsósi í Skagafirði, að sögn Jóns Þórs Víglundssonar, upplýsingafulltrúa Landsbjargar.

Björgunarsveitir frá Skagaströnd, Blönduósi og Varmahlíð eru farnar af stað upp á Vatnsskarð og björgunarsveit frá Hofsósi hefur sömuleiðis verið kölluð út.

Er þetta eins og er stærsta verkefni björgunarsveita Landsbjargar en Jón Þór reiknar með því að aðstoða þurfi á Vatnsskarði eitthvað fram á kvöld. 

Frétt af mbl.is

Björgunarsveitir kallaðar út fyrir norðan

Einn fastur og margir stopp á Holtavörðuheiði

Björgunarsveitarfólk frá Borgarnesi er á leiðinni á Holtavörðuheiði þar sem ein bifreið er föst. Holtavörðuheiði var lokað fyrr í kvöld.

„Það er bara einn bíll fastur á heiðinni en margir bílar sem eru stopp út af því og komast ekki áfram,“ segir Jón Þór.

Þeir sem ætluðu sér að aka yfir Holtavörðuheiði er bennt á hjáleið um Brattabrekku og Laxárdalsheiði, þrátt fyrir líkur á versnandi akstursskilyrðum á Brattabrekku í kvöld, að því er segir á vef Vegagerðarinnar.

Þá hefur veginum um Súðavíkurhlíð verið lokað vegna snjóflóðs. Hnífsdalsvegi verður lokað klukkan 22 vegna snjóflóðahættu.

Frétt af mbl.is

Fresta tónleikum á síðustu stundu vegna veðurs

Hífðu upp annan hest

Jón Þór segir að fyrr í kvöld hafi verið fastir bílar á Klettshálsi. Voru björgunarsveitir frá Reykhólum og Patreksfirði kallaðar út, og einnig hjálparsveitin Lómar, til að sinna því útkalli.

Í dag hífðu björgunarsveitir upp hest við Laugarvatn. Björgunarsveitir sinntu svipuðu útkalli í fyrradag þar sem Björg­un­ar­fé­lagið Árborg og Björg­un­ar­sveit­in Sig­ur­geir aðstoðuðu bónda við að ná hrossi úr skurði á Skeiðunum.

Frétt af mbl.is

Hestur fastur ofan í skurði