Súkkulaðimús með Sterkum djúpum með rísbotni er eftirréttur ársins 2024 hjá Elenoru Rós Georgsdóttur bakara sem hefur brætt landsmenn með útgeislun sinni og einlægri framkomu.

Hún galdraði fram þessa bragðgóðu mús fyrir fylgjendur sína á dögunum og skreytti hana með stjörnuljósi.

„Músin er hlægilega einföld, silkimjúk og fáránlega bragðgóð. Hún gjörsamlega bráðnar í munni og heillar alla upp úr skónum,“ segir Elenora með bros á vör.

„Músin er tilvalinn eftirréttur sem auðvelt er að henda í þegar nóg annað er að gera, geymist vel og rennur ljúft niður enda jafn falleg og hún er góð,“ bætir Elenora við.

Nú er bara að læra listina hjá Elenoru og það gæti verið lag að kveðja jólin á þrettándanum með þessari bragðgóðu mús.