Fatastíllinn | 4. janúar 2025
Klæðnaður fólks í sviðsljósinu vakti mikið umtal
Árið var viðburðaríkt í pólitíkinni en á árinu voru bæði forseta- og alþingiskosningar sem fóru líklegast ekki framhjá neinum. Smartland fjallaði ítarlega um klæðnað þeirra sem í sviðsljósinu voru enda áhugavert að rýna það hvernig fólk í ákveðnum stöðum kýs að klæða sig.
Klæðnaður fólks í sviðsljósinu vakti mikið umtal
Fatastíllinn | 4. janúar 2025
Setja bókamerki
Árið var viðburðaríkt í pólitíkinni en á árinu voru bæði forseta- og alþingiskosningar sem fóru líklegast ekki framhjá neinum. Smartland fjallaði ítarlega um klæðnað þeirra sem í sviðsljósinu voru enda áhugavert að rýna það hvernig fólk í ákveðnum stöðum kýs að klæða sig.
Árið var viðburðaríkt í pólitíkinni en á árinu voru bæði forseta- og alþingiskosningar sem fóru líklegast ekki framhjá neinum. Smartland fjallaði ítarlega um klæðnað þeirra sem í sviðsljósinu voru enda áhugavert að rýna það hvernig fólk í ákveðnum stöðum kýs að klæða sig.
Tískupistla og aðrar hugleiðingar um tískustrauma í samfélaginu gátu svo margir tengt við.
Er ofurkonujakkinn dauður?
Ein vinsælasta flík íslenskra kvenna síðustu árin hefur sennilega verið „ofurkonujakkinn“ góði, Logo Blazer frá Polo Ralph Lauren. Upphaflega var hann hvað vinsælastur á meðal kvenna úr atvinnulífinu og fékk þess vegna þetta nafn.
Vinsældir hans eru auðskiljanlegar. Hann er flottur, fæstir deila um það, passar við margt í fataskápnum og er vönduð flík frá þekktu fatamerki. Uppteknustu konur landsins eru því fljótar að koma sér út á morgnanna, jakkinn er orðinn besti vinurinn og mest notaða flíkin. Í honum er hægt að mæta fínn á fund en líka í kokteilboð eftir vinnu, ekkert vesen.
Dragtarjakkar fást í flestum fataverslunum landsins og ætli flestar konur eigi ekki einn svartan inn í skáp. Blaðamaður situr í einum núna við skrifborðið en það vantar reyndar lógó-ið. Umræddur jakki hefur verið mjög áberandi. Af hverju hefur hann verið svona vinsæll? Er það merkið á vinstra brjóstinu sem er orðið einhverskonar stöðutákn á meðal íslenskra kvenna?
Hvaðan komu sigurföt Höllu?
Halla Tómasdóttir var kjörinn sjöundi forseti Íslands í sumar. Klæðaburður Höllu vakti athygli í kosningabaráttunni - ekki síst vegna vegna litlu silkiklútanna sem hún skartaði oft og tíðum á meðan á baráttunni stóð. Upphaflega setti hún á sig klút vegna kvefs sem hún var að glíma við.
Halla klæddist ljósri dragt á laugardaginn var. Innan undir dragtinni var hún í ljósbrúnum silkitopp. Bæði toppurinn og dragtin voru keypt í versluninni Hjá Hrafnhildi. Dragtin er frá þýska tískumerkinu Marc Cain sem seldi upphaflega peysur í miklum móð en færði sig svo yfir í breiðari kvenfatalínu.
Klæðabuður Björns vakti athygli í Kaupmannahöfn
Halla Tómasdóttir, forseti Íslands, og Björn Skúlason, eiginmaður hennar, fóru í opinbera heimsókn til Danmerkur í haust.
Klæðaburður Björns vakti athygli fyrir að vera aðeins of látlaus. Hann klæddist dökkbláum jakkafötum, ljósblárri skyrtu og dökkbrúnum skóm þegar Friðrik 10. Danakonungur og María drottning tóku á móti íslensku forsetahjónunum.
Hvernig er það með reglur um klæðaburð þegar þú hittir þjóðhöfðingja? Er ekki gerð krafa um svarta skó hjá karlmönnum?
„Það fer eftir því hvað er í gangi. Ef þú ert til dæmis í smóking eða kjólfötum, þá ferðu í lakkskó. En það fer í rauninni eftir því hvað tilefnið er og hvað þú ert að fara að gera,“ segir Vilhjálmur Svan Vilhjálmsson, verslunarstjóri í Herragarðinum í Kringlunni.
„Þetta er „prótokol“ sem fer eftir því hvað er á dagskránni. Ef þetta er opinber fundur eða fundur með þjóðhöfðingjum þá eru allir í svörtum skóm. Maður sér yfirleitt að menn eru í svörtum skóm.
En það eru ekki gerðar neinar athugasemdir um þann sem er í dökkbláum fötum við brúna skó, það er voða stílhreint. Maður hugsar bara, hvað myndi James Bond gera?“
Færi hann ekki í hvíta skyrtu og svarta skó?
Steldu stílnum af Röggu Gísla
Söngkonan og einn mesti töffari Íslands, Ragnhildur Gísladóttir, var í miklu fjöri á Menningarnótt og söng á nokkrum stöðum um borgina. Til dæmis í Hörpu. Fötin hennar vöktu mikla athygli sem oft áður en hún var klædd í víðar gallabuxur, hvíta skyrtu og með silkiklút um hálsinn.
Halla skartaði 642.000 króna gullkjól
Halla Tómasdóttir forseti Íslands var glæsileg í galakvöldverði sem haldinn var í Kristjánsborgarhöll. Hún var í kjól sem hannaður var af breska fatahönnuðinum Jenny Packham. Kjóllinn er gylltur að lit, alsettur kristöllum og pallíettuskreyttur.
Hálsmálið á kjólnum er hringlaga en ermarnar eru svolítið eins og slá sem nær út á axlirnar.
Þetta er ekki í fyrsta skipti sem hönnun Jenny Packham ratar í fínar veislur því stórstjörnur á borð við Kate Winslet, Emily Blunt og Sarah Jessica Parker hafa allar sést í kjólum hönnuðarins. Hönnun hennar hefur líka sést á hvíta tjaldinu í James Bond-kvikmyndinni Die Another Day og Casino Royale.
Kjóllinn sem Halla klæddist kostar 4.753 dali ef hann er pantaður á netinu. Ef það er reiknað út á gengi dagsins þá væri hægt að fá kjólinn fyrir 642.000 krónur.
Laufey ein best klædd á Golden Globe
Golden Globe-verðlaunahátíðin var haldin í Los Angeles í Bandaríkjunum snemma í janúar á síðasta ári. Þangað mættu skærustu stjörnur heims í sínu allra fínasta pússi og gengu rauða dregilinn.
Meðal þeirra var engin önnur en tónlistarkonan Laufey Lín Jónsdóttir sem hefur farið sigurför um heiminn síðastliðið ár. Hún var glæsileg á rauða dreglinum í kjól frá Rodarte og með skart frá Cartier.
Faldi ekki neitt í gegnsæjum kjól
Bandaríska fyrirsætan Emily Ratajkowski vakti mikla athygli í gegnsæjum kjól frá Atelier Versace á Met Gala-viðburðinum. Viðburðurinn var haldinn á Metropolitan-safninu í New York-borg.
Allra augu voru á Ratajkowski þegar hún birtist á myntugræna dregilinum en fyrirsætan klæddist engu undir kjólnum. Það kom vel í ljós þegar hún stillti sér upp fyrir framan ljósmyndara.
Ratajkowski er ófeimin að sýna líkama sinn og birtir reglulega myndir af sér fáklæddri á Instagram-síðu sinni.
Áslaug Arna blæs hárið með 100 þúsund króna hárblásara
Glæsilegur hárblástur Áslaugar Örnu Sigurbjörnsdóttur, háskóla-, iðnaðar- og nýsköpunarráðherra, var áberandi í umræðunni eftir umdeild ummæli Ásgeirs Bolla Ásgeirssonar, sem jafnan er kenndur við verslunina 17, um ungar konur.
Ásgeir vill bjóða fram viðbótarlista fyrir Sjálfstæðisflokkinn undir merkjum DD-lista. Í viðtali á Vísi sagði Ásgeir: „Við erum ekkert að leita að einhverjum, hvað á ég að kalla það. Einhverjum nýútskrifuðum stúlkum sem ætla bara að blása á sér hárið og naglalakka sig. Þó ég hafi fulla virðingu fyrir ungu fólki þá þurfum við fólk með reynslu og eitthvað fólk sem hefur áunnið sér eitthvað í lífinu.“
Áslaug Arna svaraði ummælunum í færslu á Facebook þar sem hún skrifaði: „Hjá sumum er Bollinn alltaf hálf tómur, en hjá „nýútskrifuðum” stelpum með blásið hár og naglalakk er Bollinn fullur.“
Í kjölfarið birti hún myndband af sér þar sem hún var að blása á sér hárið, en til þess notaði hún hinn fræga Dyson-hárblásara sem hefur slegið rækilega í gegn um allan heim. Hann þykir mikil bylting í hármótunarbransanum þar sem hann bæði þurrkar og stíliserar hárið á sama tíma.
Hildur mætti í sama kjólnum fjögur ár í röð
„Þingsetningardagar undanfarinna ára í lífsins ólgusjó sem er gott að minna sig á að býður upp á alls konar útgáfur af tilveru. En reyndar alltaf sami kjóllinn,“ segir Hildur Sverrisdóttir þingflokksformaður Sjálfstæðisflokksins.
Hildur hefur klæðst sama kjólnum síðustu fjögur ár á þingsetningunni. Kjóllinn er frá merkinu ME+EM. Þó hún hafi mætt á sama stað þessi ár, í sama kjólnum þá var lífið heima við krefjandi og fjölbreyttara.
„2024 með sérlega hressan lítinn gaur. 2023 með fimm mánaða snáða. 2022 með laumufarþega komin sjö vikur á leið. 2021 í miðri tæknifrjóvgunarmeðferð sem tókst ekki.“
Klæðast karlar á miðjum aldri of þröngum buxum?
Ég sótti viðburð í miðbæ Reykjavíkur fyrir nokkrum dögum. Þar var fólk á öllum aldri en mun fleiri af yngri kynslóðinni. Þetta voru listamenn, tónlistarmenn og hönnuðir og langflestir áttu það sameiginlegt að vera í sama sniði af buxum; mjög síðum og afskaplega víðum.
Síðar sama kvöld var ég stödd í einni af fínni mathöllum bæjarins þar sem langflestir gestirnir voru karlar á miðjum aldri. Þó að ég hafi það ekki staðfest þá gat ég samt séð af klæðaburðinum að þeir voru minna listrænir og meira fyrir leik að reikningsdæmum. Á meðal þeirra var líka eitt ríkjandi buxnasnið og það var mun þrengra.
Kynslóðabil í klæðnaði er eðlilegt en þarna eru miklar öfgar. Víðar og mjög síðar buxur áttu heima á viðburðinum en þessar þröngu í mathöllinni.
Það eru í kringum fimmtán ár síðan þröngar buxur urðu hluti af fataskáp flestra og þá allra kynja. Konur voru aðeins á undan sem oftar en þetta hélst þó í hendur. Áhrifin má rekja til tískuáhrifavalda þess tíma eins og fyrirsætunnar Kate Moss og tónlistarmannsins Petes Dohertys. Þá var fatastíll fólks rokkaður með bóhem-ívafi.
