Guðmundur Ari Sigurjónsson var kjörinn þingflokksformaður Samfylkingarinnar á fyrsta þingflokksfundi flokksins í gær. Guðmundur hefur verið formaður framkvæmdastjórnar Samfylkingarinnar frá landsfundi haustið 2022.

Arna Lára Jónsdóttir var kjörin varaformaður stjórnar þingflokks og Kristján Þórður Snæbjarnarson kjörinn ritari. Fram kom í tilkynningu flokksins að kosningin hefði verið samhljóða og samkvæmt tillögu formanns flokksins, Kristrúnar Frostadóttur.

Frétt af mbl.is

Guðmundur Ari þingflokksformaður Samfylkingarinnar

Athygli hefur vakið að Dagur B. Eggertsson, þingmaður flokksins og fyrrverandi borgarstjóri, hafi ekki hlotið kjör í ábyrgðarstöðu þingflokksins eins og margir bjuggust við.

„Ég var alveg tilbúinn til þess að takast á við það verkefni að verða þingflokksformaður, ekki spurning um það, og gerði alveg ráð fyrir því. Þannig að ég fer til annarra verkefna,“ segir Dagur í samtali við Morgunblaðið.