Mikið gjóskufall gæti orðið innan þrjátíu kílómetra frá Bárðarbungu, verði þar sprengigos sem brýtur sér leið í gegnum jökulinn. Þykkt gjóskufallsins gæti þá numið allt frá 20 sentimetrum og yfir 10 metra.

Þetta kemur fram í eldfjallavefsjánni, sem Veðurstofan, Háskóli Íslands og almannavarnir halda úti.

Engin byggð er þar innan færis, en þó segir að samgöngur á landi gætu stöðvast í stóru gosi.

Í miklu gjóskufalli gætu fjarskipti truflast eða stöðvast, rafmagnslínur skemmst og truflun orðið á rafmagnsframleiðslu. Algjört myrkur gæti varað klukkustundum saman undir gosmekki.

Öflug skjálftahrina hófst í Bárðarbungu í morgun og hefur viðlíka ekki sést frá því í aðdraganda goss í eldstöðinni, í Holuhrauni nánar tiltekið, í ágúst árið 2014.

Frétt af mbl.is

Öflug skjálftahrina í Bárðarbungu

Stór jökulhlaup hafa orðið

Bent er á að jökulhlaup hafi orðið á síðustu þúsund árum, þar sem rennsli hafi náð 3.000 til 30.000 rúmmetrum á sekúndu.

Til samanburðar má nefna að meðalrennsli Ölfusár við Selfoss er um 400 rúmmetrar á sekúndu.

Mun stærri jökulhlaup, þar sem mesta rennslið fór umfram 100.000 rúmmetra á sekúndu, urðu á forsögulegum tíma.

Þegar litið er fjær upptökunum, eða í 30 til 150 kílómetra fjarlægð frá hugsanlegu gosi undir jöklinum, er aftur tekið fram að algjört myrkur gæti varað klukkustundum saman.

Gæti haft áhrif á flugleiðir

Samgöngur og fjarskipti yrðu þar fyrir truflunum og skemmdir yrðu á landi og gróðri í jökulhlaupum.

Enn fjær, eða í yfir 150 kílómetra fjarlægð frá mögulegum upptökum, gæti gosmökkurinn haft áhrif á flugleiðir yfir Íslandi og víðar.

Gasútstreymi og gosmóða í stórum gosum gætu þá valdið loftmengun.