Góðgerðarsamtökum bandarísku athafnakonunnar Paris Hilton, 11:11 Media Impact, tókst að safna ríflega 800 þúsund bandaríkjadölum eða 113 milljónum íslenskra króna til að hjálpa fórnarlömbum gróðureldanna sem nú geisa í Los Angeles-borg í Kaliforníu.

Hilton, sem sjálf missti heimili sitt í eldsvoðanum, setti upp sérstakan neyðarsjóð fyrir barnafjölskyldur á svæðinu og greindi frá framtakinu á Instagram-síðu sinni. 

Fólk og fyrirtæki voru ekki lengi að taka við sér og ekki leið á löngu þar til söfnunarupphæðin var komin vel yfir 100 milljónir íslenskra króna. Sjálf styrkti Hilton framtakið myndarlega.

Frétt af mbl.is

Myndskeið: Heimili Parísar Hilton brunnið til kaldra kola

„Sem móðir get ég ekki ímyndað mér sársaukann og óttann sem fylgir því að vera ekki með öruggan samastað fyrir börnin sín. Ég ákvað því að stofna neyðarsjóð til að styrkja fjölskyldur sem hafa þurft að flýja með ung börn sín,” skrifaði Hilton, sem er móðir tveggja ungra barna, við færsluna.

Hilton hefur tekið mikinn þátt í hjálparstarfi tengdu náttúruhamförunum síðustu daga. Hún heimsótti dýraathvarf í Pasadena, sinnti sjálfboðastarfi þar og endaði á að taka hund í fóstur. Einnig hefur hún látið myndarlegar upphæðir renna til annarra góðgerðarsamtaka.