Um 170 milljón TikTok-notendum í Bandaríkjunum verður að óbreyttu meinaður aðgangur að miðlinum á morgun vegna banns sem tekur þá í gildi.

Donald Trump, verðandi Bandaríkjaforseti, íhugar að fresta banninu um 90 daga, þó ekki fyrr en eftir að hann tekur við embætti á mánudaginn.

Hæstirétt­ur Banda­ríkj­anna staðfesti í gær lög sem banna TikT­ok í landinu. Var kínverska móðurfélagi fyrirtækisins, ByteDance, gert að selja miðilinn ell­egar sæta banni í Banda­ríkj­un­um frá 19. janúar.

Frumvarp laganna var í apríl samþykkt með yfirgnæfandi meirihluta full­trúa­deildar Banda­ríkjaþings.

Frétt af mbl.is

„Verð að fá tíma til að fara yfir stöðuna“

Líklega tilkynnt á mánudaginn

Trump ræddi bannið við Xi Jinping Kínaforseta í gær og sagði við NBC-fréttastofuna að hann gæti frestað banninu um 90 daga eftir að hann tekur við embætti sínu.

„Ég held að það sé vissulega kostur sem við skoðum. 90 daga framlenging er eitthvað sem verður líklegast gert, því það er viðeigandi,“ sagði hann.

„Ef ég ákveð að gera það mun ég líklega tilkynna það á mánudaginn.“

Frétt af mbl.is

TikTok-stjörnur í rusli yfir banninu