Uppskriftir | 19. janúar 2025

Pönnukökur Ömmu Andar slá alltaf í gegn

Hvað er betra en nýbakaðar pönnukökur á sunnudegi í faðmi fjölskyldunnar? Það er fátt betra en íslenskar pönnukökur og á þessum árstíma er notalegt að eiga góða stund saman í eldhúsinu og baka þær.

Pönnukökur Ömmu Andar slá alltaf í gegn

Uppskriftir | 19. janúar 2025

Amma Önd kann að gera ekta íslenska pönnukökur sem eru syndsamlega góðar með sykri. Samsett mynd

Þessi uppskrift er skotheld og á ekki að geta klikkað ef farið er eftir leiðbeiningum en Amma Önd í Andabæ er snillingur í pönnukökugerð og bræðurnir Ripp, Rapp og Rupp elska pönnukökurnar hennar. Amma stráir sykri yfir sínar pönnukökur en Ripp, Rapp og Rupp finnst best að hella hreinni jógúrt og ferskum ávöxtum yfir sínar.

Svo getur hver og einn valið það sem honum þykir best á sína pönnuköku.

Uppskriftina er að finna í matreiðslubókinni Stóru Disney-uppskriftabókinni en þar er að finna vinsælustu Disney-uppskriftirnar. Bókin er bæði einföld og þægileg í notkun og hentar yngri kynslóðinni vel.

Fátt er betra en upprúllaðar pönnukökur með sykri. Ljósmynd/Edda útgáfa

Pönnukökur Ömmu Andar

375 g hveiti
1 msk. sykur
Örlítið salt
1 tsk. lyftiduft
1 tsk. matarsódi
3 egg
1 tsk. vanilludropar
600–700 ml mjólk
75 g smjör, eða smjörlíki, brætt

Aðferð:

Setjið þurrefnin í skál.
Bætið eggjum og vanilludropum saman við.
Hellið helmingnum af mjólkinni saman við og hrærið hraustlega í svo ekki myndist kekkir.
Bætið svo því sem eftir er af mjólkinni rólega saman við eftir þörfum og hrærið viðstöðulaust á meðan. Athugið að deigið á að vera þunnt.
Bræðið smjörið og bætið saman við. Blandið vel.
Hitið pönnuna vel áður en byrjað er á bakstrinum.
Hellið um 4 msk. af deigi á pönnuna og rennið henni til þannig að deigið þeki botninn.
Snúið pönnukökunni við með spaða þegar loftbólur byrja að myndast.
Staflið pönnukökunum upp á disk.
Berið fram með því meðlæti sem ykkur finnst best.