„Grænland er dásamlegur staður og við þurfum það vegna alþjóðlegs öryggis. Ég er viss um að Danmörk kemur til,“ sagði Donald Trump Bandaríkjaforseti við blaðamenn þegar hann sneri aftur í forsetaskrifstofuna í Hvíta húsinu eftir að hann var settur í embætti í gær.

Trump nefndi Grænland ekki í innsetningarræðu sinni, en vék hins vegar að því að hann hygðist endurheimta Panamaskurðinn, sem hann sagði að Bandaríkjamenn hefðu aldrei átt að gefa frá sér.

Trump sagði í desember að hann hefði hug á að kaupa Grænland og kvaðst ekki útiloka að beita valdi til þess að ná markmiðum sínum. Ummælin í gær lét hann falla eftir spurningu blaðamanns.

Ekki ástæða til að slaka á

Lars Lökke Rasmussen, utanríkisráðherra Danmerkur sagði í gær að það gengi ekki að vera með heimsskipan þar sem lönd gætu bara lagt undir sig það sem þeim sýndist bara ef þau væru nógu stór, burtséð frá hvaða lönd það væru.

Hann sagði að það væri ekki ástæða til að slaka á þótt Trump hefði ekki nefnt Grænland í innsetningarræðu sinni. Þó væri jákvætt að hann hefði ekki nefnt Grænland í ræðunni.

„Þrátt fyrir allt er munur á því, sem sagt er í innsetningarræðu, og hvaða binding fylgir því og hvert svarið er við spurningum, sem blaðamenn spyrja,“ sagði Rasmussen, samkvæmt frétt danska ríkisútvarpsins.

Múte B. Egede, formaður grænlensku landstjórnarinnar, hefur boðað til blaðamannafundar núna klukkan þrjú að íslenskum tíma vegna „málefna dagsins“.