Inflúensan geisar nú af fullum krafti í samfélaginu. Guðrún Aspelund sóttvarnarlæknir segir ekki of seint að fá bólusetningu. Bóluefni er til í landinu og hún hvetur eldra fólk og þá sem kunna að vera í áhættuhópum að íhuga málið. Guðrún er gestur Dagmála Morgunblaðsins í dag og ræðir þar meðal annars þær fjölmörgu öndunarfærasýkingar sem herja á landann þessar vikurnar. Af nógu er að taka. Það er hennar mat að í vetur hafi og muni tugþúsundir Íslendinga kljást við slíkar sýkingar.

Þátttaka eldra fólks og þeirra sem eru í áhættuhópum þegar kemur að bólusetningu vegna inflúensu er ekki nema fjörutíu til fimmtíu prósent, þegar æskilegt hlutfall til að ná árangri, þyrfti að liggja nær sjötíu prósentum.

Inflúensan í ár virðist vera á svipuðu róli og í fyrra þó svo að innlagnir séu ívið fleiri en á sama tíma í fyrra. Það geti þó jafnað sig út þegar líður á flensutímabilið sem oft geisar fram á vorið.

Lítið um covid þessa mánuðina

Sóttvarnarlæknir ræðir fleiri hluti í Dagmálum. Lítið ber á Covid-19-veirunni þessa mánuðina en hún er enn til staðar og fylgst er grannt með þróun hennar. Guðrún fer yfir hvað er vitað um uppruna veirunnar á þessum tímapunkti.

Fuglaflensan sem valdið hefur verulegum fugladauða upp á síðkastið hér á landi er einnig til umræðu. Guðrún telur afar litlar líkur á að hún geti smitast yfir í fólk, og þá sérstaklega sú tegund sem hér er um að ræða. Engu að síður fylgist embætti hennar grannt með. Loks ræðir hún hættur sem framtíðin getur borið í skauti sér til að mynda þegar sífrerinn í Síberíu og víðar í heiminum þiðnar í því hlýindaskeiði sem jörðin gengur nú í gegnum.

Með fréttinni fylgir brot úr viðtalinu við Guðrúnu Aspelund sóttvarnarlækni. Viðtalið í heild sinni geta áskrifendur horft eða hlustað á með því að smella á slóðina hér að neðan.

Inflúensan skollin á af fullum þunga