Hin níu ára gamla Chanel Nicole Marrow, dóttir rapparans og leikarans Ice-T og glamúrfyrirsætunnar Coco Austin, þykir sláandi lík föður sínum.

Ice-T, sem heitir réttu nafni Tracy Lauren Marrow, deildi mynd af sér ásamt dóttur sinni á samfélagsmiðlasíðunni Instagram í gærdag, sem vakti strax mikla athygli.

Margir rituðu athugasemdir við færsluna og minntust sérstaklega á líkindi feðginanna, en flestir voru sammála um að stúlkan væri eins og snýtt út úr nefi föður síns.

„Þú þarft sko ekki erfðapróf, hún er alveg eins og þú,“ skrifaði einn netverji á meðan annar forvitnaðist um hvort rapparinn hefði einfaldlega klónað sig.

Ice-T, sem er best þekktur fyrir hlutverk sitt í bandarísku þáttaröðinni Law & Order: Special Victims Unit, á þrjú börn, tvær dætur og einn son, á aldursbilinu 9 til 48 ára, en Chanel er eina barn hans og Austin.  

Frétt af mbl.is

Sjö ára í drykkjuleik með mömmu

Frétt af mbl.is

Gagnrýnd fyrir óviðeigandi dans með sjö ára dóttur sinni