Kanadísk stjórnvöld munu bregðast ókvæða við reisi Donald Trump Bandaríkjaforseti tollamúr milli Bandaríkjanna og nágrannaríkisins með 25 prósenta innflutningstollum á kanadískar vörur.

Frá þessu greindi kanadíski forsætisráðherrann Justin Trudeau í dag í kjölfar þess er Trump lét í veðri vaka að ofurtollur þessi gæti verið á næsta leiti og svo skammt undan sem í febrúar.

„Kanada mun bregðast við og þar er allt uppi á borðum,“ sagði Trudeau á blaðamannafundi og bætti því við að stjórnvöld í Ottawa, stjórnarsetri Kanada, kæmu til með að beita nágrannaríki sitt skjótum, áhrifaríkum og úthugsuðum mótleik og mæta hækkunum Trumps dal fyrir dal.