Donald Trump Bandaríkjaforseti hefur þegar rekið fjóra háttsetta embættismenn sem Joe Biden, fyrrverandi forseti Bandaríkjanna, skipaði. 

Þetta tilkynnti hann í nótt á samfélagsmiðlinum sínum Truth Social, þar sem hann varaði jafnframt við því að þetta væri aðeins byrjunin. Hann ætti eftir að láta yfir þúsund í viðbót fara.

„Starfsfólk mitt á forsetaskrifstofunni vinnur nú að því að bera kennsl á og fjarlægja yfir þúsund manns sem voru skipaðir í fyrri forsetatíð, sem samræmast ekki framtíðarsýn okkar um hvernig eigi að gera Bandaríkin frábær aftur,“ segir í færslu Trumps á samfélagsmiðlinum.