„Þegar ég fæ að heyra það að ég sé tognaður þá hellast yfir mig allskonar tilfinningar,“ sagði Arnar Freyr Arnarsson, landsliðsmaður Íslands í handknattleik og leikmaður Melsungen í Þýskalandi, í Dagmálum.

Arnar Freyr, sem er 28 ára gamall, tognaði aftan í læri í vináttulandsleik gegn Svíþjóð í Kristianstad, viku áður en íslenska landsliðið hóf leik á HM í Króatíu, Danmörku og Noregi og þurfti af þeim sökum að draga sig úr leikmannahóp Íslands á mótinu.

Aldrei liðið jafn vel á landsliðsæfingum

Aldrei liðið jafn vel

Þetta er í fyrsta sinn sem Arnar Freyr meiðist alvarlega á ferlinum en hann vonast til þess að snúa aftur til æfinga með félagsliðinu sínu í febrúar.

„Ég held að fólk geri sér ekki almennilega grein fyrir því en allir leikmennirnir sem eru að spila á HM til dæmis eru að gera allt, yfir tímabilið, til þess að vera klárir í janúar,“ sagði Arnar Freyr.

„Ég veit ekki hvort ég megi segja þetta. Leikmenn sleppa stundum leikjum úti, til þess eins að vera heilir í janúar. Það er ekkert skemmtilegra en að spila fyrir landsliðið og þetta var mjög erfitt.

Þetta er annað mótið hans Snorra og maður fann það, um leið og maður mætti á æfingar, að andinn á æfingum var allt annar og mér hefur aldrei liðið jafn vel á landsliðsæfingum,“ sagði Arnar Freyr meðal annars.

Viðtalið við Arnar Frey í heild sinni má nálgast með því að smella hér eða á hlekkinn hér fyrir ofan.

Arnar Freyr Arnarsson. mbl.is/Kristinn Magnússon