„Eins og staðan er í dag þá eigum við góða möguleika á því að komast í undanúrslitin,“ sagði Arnar Freyr Arnarsson, landsliðsmaður Íslands í handknattleik og leikmaður Melsungen í Þýskalandi, í Dagmálum.

Arnar Freyr, sem er 28 ára gamall, tognaði aftan í læri í vináttulandsleik gegn Svíþjóð í Kristianstad, viku áður en íslenska landsliðið hóf leik á HM í Króatíu, Danmörku og Noregi og þurfti af þeim sökum að draga sig úr leikmannahóp Íslands á mótinu.

Aldrei liðið jafn vel á landsliðsæfingum

Króatarnir erfiðir

Arnar Freyr er bjartsýnn fyrir hönd íslenska liðsins á HM en liðið hefur unnið alla fjóra leiki sína á mótinu til þessa.

„Króatarnir eru erfiðir en þeir eru líka búnir að missa einhverja leikmenn í meiðsli,“ sagði Arnar Freyr.

„Ef við spilum gegn þeim, eins og við gerðum gegn Slóveníu og Egyptalandi, þá eigum við að vinna þennan milliriðil. Ef við vinnum riðilinn munum við mæta Ungverjalandi og við eigum að vinna þá líka.

Mér finnst við eiga góða möguleika á undanúrslitunum svo lengi sem allir leikmenn liðsins haldast heilir,“ sagði Arnar Freyr meðal annars.

Viðtalið við Arnar Frey í heild sinni má nálgast með því að smella hér eða á hlekkinn hér fyrir ofan.

Leikmenn íslenska liðsins fagna eftir sigurinn gegn Egyptalandi. mbl.is/Eyþór Árnason