Karlmaður hefur verið ákærður fyrir kynferðisbrot og stórfelldar ærumeiðingar gagnvart barnsmóður sinni og fyrrverandi sambýliskonu með því að hafa birt kynferðislegar myndir af henni á Facebook og á Snapchat ásamt smánandi texta.

Í ákæru embættis héraðssaksóknara kemur fram að maðurinn hafi birt fimm myndir af konunni nakinni, en að hann hafi krotað yfir brjóst og kynfæri á myndunum. Þá hótaði hann jafnframt að setja myndir af henni inn á síðu sem er þekkt fyrir að hýsa myndir af þessum toga.

Í ákærunni má sjá að málið virðist tengjast deilum fólksins um börn þeirra. Þannig hafði hann meðal annars skrifað á eina myndina, sem sýndi konuna nakta niður fyrir mjaðmir: „Hún notar börnin“ og „Þá má allt“.

Auk þess sem krafist er þess að maðurinn verði dæmdur til refsingar fer konan fram á 1,5 milljónir í miskabætur vegna myndbirtingar mannsins. Málið er rekið fyrir Héraðsdómi Norðurlands vestra.