Íslenska útivistarmerkið 66°Norður lagði áherslu á tímalausa hönnun og gæði í útifatnaði á tísku­vik­unni í Kaup­manna­höfn sem fram fór fyrr í vikunni. Fataframleiðandinn sýndi flíkur frá árunum 1950-2025 á sér­stakri og óhefðbundinni sýn­ingu sem bar heitið 99 ár - 867,815,464 klukku­stund­ir.

Nafnið er tákn­rænt fyr­ir langa sögu fyr­ir­tæk­is­ins sem er orðið 99 ára. Sýn­ing­in var miðpunkt­ur á milli fortíðar, nútíðar og framtíðar þar sem bæði sögu­leg ís­lensk arf­leið og nú­tíma­leg hönn­un byggð á nýj­ustu tækni og sjálf­bærni verða í for­grunni.

Allt að 70 ára gamlar flíkur

Dregn­ar voru fram fjöl­marg­ar, sögu­leg­ar flík­ur og sum­ar af þeim allt að 70 ára gaml­ar. Þarna mátti sjá fyrsta sjó­stakk­inn og fatnað frá ólymp­íu­leik­um. Sýn­ing­in bauð meðal ann­ars upp á snertiskynj­un, hljóðupp­lif­un og ís­lensk­an foss og veitti gest­um inn­sýn í hönn­un­ar­ferli og hand­verk fyr­ir­tæk­is­ins á ein­stak­an hátt.

Sýningin var haldin á Råd­huspladsen 37 og vakti mikla athygli en rúmlega þúsund gestir voru viðstaddir sýninguna. Þetta var í fyrsta skiptið sem 66°Norður tók þátt í tísku­vik­unni en fyrirtækið hef­ur rekið versl­un í Kaup­manna­höfn um nokk­urt skeið.

Sýningin verður einnig haldin á Íslandi og í London síðar.