Í dag, 1. febrúar, tóku nýjar tollareglur Donalds Trumps Bandaríkjaforseta gildi gagnvart báðum nágrannaríkjum Bandaríkjanna og Kína. Er innflutningur fjölda vörutegunda frá Kanada og Mexíkó nú undirlagður 25 prósenta tollum á meðan Kína fékk tíu prósentustiga hækkun ofan á þá tolla sem nú þegar greiðast af vörum þaðan.

Forsetinn gaf ekki langan fyrirvara, tilkynnti um tollana í gær og sagði við sama tækifæri að ríkin þrjú gætu ekkert gert til að fresta gildistöku þessa nýja veruleika.

Kanada fékk þó frest að hluta á tollahækkunum á olíuinnflutning til Bandaríkjanna – en aðeins í tvær vikur. Þar til um miðjan mánuðinn verður tollur á kanadíska olíu því tíu prósent, en 25 eftir hálfan mánuð, og hækkuðu hlutabréf olíufyrirtækja þegar umtalsvert við yfirlýsinguna.

Þvingun vegna innflytjenda og fentanýls

Tollarnir eru þvingunaraðgerð og að sjálfsögðu greindi forseti frá því hvað héngi á spýtunni: Ofurtollarnir verða í gildi þar til ríkin þrjú hafa gert nægilega mikið, að mati til Trumps, til að stemma stigu við flæði innflytjenda og hins banvæna ópíóðalyfs fentanýls til Bandaríkjanna.

„Forsetinn mun á morgun [í dag] taka upp 25 prósenta toll gagnvart Mexíkó, 25 prósenta toll gagnvart Kanada og tíu prósenta toll gagnvart Kína sem svar við ólöglega fentanýlinu sem [þessi ríki] hafa orðið sér úti um og leyft dreifingu á til landsins okkar með þeim afleiðingum að tugir milljóna Bandaríkjamanna hafa látið lífið,“ sagði Karoline Leavitt, talskona Hvíta hússins, á blaðamannafundi í gær.

Reuters

Bloomberg

CNN (hvaða vörur eru lagðar ofurtollum?)