Fyrrum landsliðsmennirnir í körfubolta Ingibjörg Jakobsdóttir og Arnar Freyr Jónsson reka speglahótelið, ÖÖD Hekla Horizon, við Heklurætur sem opnar í febrúar. Hótelið hefur vakið heimsathygli og var m.a. fjallað um það á vef Travel & Leisure á dögunum. Hugmyndin af speglahótelum um víða veröld kemur frá ÖÖD Hötels en eigendur þess eru bræðurnir Andreas og Jaak Tiik.

Arnar Freyr vinnur sem flugumferðarstjóri á Keflavíkurflugvelli og Ingibjörg kemur fram á körfuboltakvöldi kvenna í sjónvarpinu ásamt því að reka hótelið og gistiheimili í Grindavík, enda með reynslu í ferðamannabransanum til margra ára.

Það er nóg að gera hjá henni en hún segir bókanir á speglahótelið hrannast inn og að næstu mánuðir líti vel út miðað við að engar umsagnir séu til né annað sem staðfesti gæðin, ekki enn allavega.

„Það hefur mikið að segja að við séum í samvinnu við ÖÖD en vörumerkið er þekkt um allan heim,“ segir Ingibjörg.

Frétt af mbl.is

Íslenska „speglahótelið“ við Heklu vekur heimsathygli

Speglahótelið við Heklurætur er skemmtilega hannað og opnar í dag 1. febrúar. Ljósmynd/Aðsend

Speglahótelið í ljósaskiptunum er draumi líkast. Ljósmynd/Aðsend

Eldgosið sem breytti öllu

„Við kynntumst í gegnum körfubolta,“ byrjar Ingibjörg þegar hún hefur frásögnina á því hvernig leiðir þeirra Arnars lágu saman. Bæði léku þau körfubolta hér heima með sínum heimaliðum, Ingibjörg með Grindavík en Arnar með Keflavík. Þau eru Íslands- og bikarmeistarar með liðum sínum, léku fyrir landslið Íslands og bjuggu um tíma í Danmörku þegar þau voru í atvinnumennsku þar í landi. 

„Við fluttum heim 2012 eða 2013.“

Frá Danmörku lá leiðin til Grindavíkur þar sem þau settust að í þriggja hæða vatnstank sem þau höfðu breytt í þriggja hæða einbýlishús. „Við bjuggum þar í fjögur ár og eignuðumst fyrsta barnið.“

Þriggja hæða einbýlishús sem hjónin Ingibjörg og Arnar byggðu á gömlum vatnstanki í Grindavík eftir að þau fluttu heim frá Danmörku. Ljósmynd/Aðsend

Þegar þau fjárfestu í stórri lóð í Þórkötlustaðahverfinu í Grindavík fengu þau gistiheimilisréttindi og leigðu út vatnstankinn, eða Converted Watertower, til ferðamanna.

Húsnæðið sem stóð á lóðinni í Þórkötlustaðahverfi kallast Búðir og er þekkt í Grindavík líkt og önnur gömul hús í hverfinu. Þau tóku húsið í gegn, rifu það nánast niður og byggðu nýtt. „Við eigum stórt land sem húsið stendur á og ætluðum jafnvel að vera með búskap þar í framtíðinni. Við fluttum inn í það 2021 og vorum að leggja lokahönd á verkið þegar bærinn var rýmdur.“ Þar vísar Ingibjörg í örlagadaginn mikla þegar eldgos í Sundhnúkagígaröðinni varð til þess að Grindvíkingar þurftu frá bænum að hverfa, 10. nóvember 2023.

Frétt af mbl.is

Neyðarstig: Grindavík rýmd

Í auga eldsins. Einbýlishúsið sem Ingibjörg og Arnar byggðu og rauðglóandi himinn af völdum eldgoss í bakgrunni. Ljósmynd/Aðsend

Plön Ingibjargar og Arnars breyttust í einni hendingu í nóvember 2023 þegar Grindavík var rýmd vegna eldgossins. Ljósmynd/Aðsend

Endalaust þakklæti

Í einni svipan tók líf fjölskyldunnar miklum breytingum. Í fyrstu dvöldu þau í sumarbústað hjá fjölskyldu Ingibjargar en bæði föður- og móðurfjölskyldan hennar eru frá og voru búsett í Grindavík. Síðan fluttu Ingibjörg og Arnar til Keflavíkur með dæturnar þrjár og fengu athvarf á heimili foreldra Arnars. 

Spurð segir Ingibjörg breytingarnar hafa gengið upp og ofan. „Við erum auðvitað rosalega heppin. Tengdaforeldrar mínir lánuðu okkur húsnæðið sitt og fluttu sjálf í aðra íbúð og fyrir það erum við endalaust þakklát. Við getum sennilega aldrei borgað til baka góðmennskuna sem þau hafa sýnt með því að koma okkur í öruggt skjól og þannig gert okkur kleift að halda áfram.“ Miðjudóttirin sem nú er rúmlega þriggja ára og var tveggja ára þegar rýmingin varð hafi fyrstu sex mánuðina viljað „súpa vatn heima“. Söknuðurinn var mikill.

Fjölskyldan á góðri stund. Ingibjörg segir þau ekki getað þakkað tengdaforeldrum sínum nóg fyrir alla þá aðstoð sem þau hafa veitt þeim. Ljósmynd/Aðsend

„Draumurinn er auðvitað að geta farið til baka til Grindavíkur en við eigum þrjár dætur sem eru líka að búa sér til líf og þær þurfa stöðugleika. Það er ekkert sjálfgefið að rífa þær aftur upp með rótum.“

Á þessum tíma breyttust aðrar áætlanir; vatnstanknum í Grindavík sem var í útleigu til ferðamanna var auðvitað lokað og staðsetningin fyrir speglahótelið, sem átti upphaflega að vera í Grindavík, var færð.

„Við vorum staðráðin að láta ástandið ekki rífa okkur niður og gera okkur neikvæð eða þunglynd. Við kusum frekar að líta á björtu hliðarnar í þessum aðstæðum og leitast eftir tækifærum. Þegar einar dyr lokast opnast aðrar. Það var alltaf okkar hugsun!“

En af hverju varð Heklusvæðið fyrir valinu fyrir speglahótelið?

„Okkar hugsun var alltaf suðurströndin. Heklusvæðið er frábært en svo voru líka forsendur ÖÖD fyrirfram gefnar sem við í raun komum inn í.“

Ingibjörg segist spennt fyrir að vinna meira með ÖÖD Hötels. Ljósmynd/Aðsend

Himinninn er fallegur í morgunsólinni við Heklu. Ljósmynd/Aðsend

Alin upp við ferðalög innanlands

Ingibjörg segir fjölskylduna mjög duglega að ferðast innanlands. „Við Arnar eru bæði alin upp við að ferðast innanlands. Við eigum hjólhýsi og dveljum alltaf í um tíu til tuttugu daga á sumri úti á landi,“ segir Ingibjörg en að síðasta sumarið hafi dagarnir verið rúmlega fjörutíu. 

Hverjir eru uppáhaldsstaðirnir innanlands? 

„Vestfirðir. Við elskum t.d. Þingeyri, Tálknafjörð og sunnanverða Vestfirði. Svo er auðvitað Þórsmörk og Landmannalaugar, en það er alltaf að geggjað að koma þangað. Austfirðirnir geðveikir. Ásbyrgi austur af og Mjóifjörður er geðveikur.“ Svo Ingibjörg er nánast komin hringinn í kringum landið þegar hún hefur sagt frá uppáhaldsstöðunum.

Þá bætir hún við: „Þar sem er gott veður á Íslandi er geðveikt að vera.“

„Þar sem er gott veður á Íslandi er geðveikt að vera.“ Ljósmynd/Aðsend

Ingibjörg segir Vestfirði einn af uppáhaldsstöðum fjölskyldunnar á landinu. Ljósmynd/Aðsend

Í dag rekur fjölskyldan Converted Watertower og speglahótelið. Aðsóknin í það fyrrnefnda hefur þó dalað í kjölfar náttúruhamfaranna á Suðurnesjum. „Turninn opnaði aftur þegar Grindavík var opnuð. Við erum að fá ferðamenn þangað en ekki eins og áður. Þetta rúllar á fáum nóttum,“ segir Ingibjörg og bætir við að aðsóknin hafi verið mjög góð fyrir rýmingu bæjarins. 

Það eru spennandi tímar framundan hjá fjölskyldunni með opnun speglahótelsins og von til að starfsemin útvíkki. „Það eru alltaf eitthverjar pælingar í gangi en við viljum koma þessu fyrst í góðan farveg áður en við förum að hugsa eitthvað lengra,“ segir Ingibjörg að lokum.

Norðurljósasýning, en hægt er að fylgjast með norðurljósunum úr svokallaðri norðurljósastofu í speglahúsunum. Ljósmynd/Aðsend

Í dag rekur fjölskyldan gistiheimilið Converted Watertower og speglahúsin við Heklu. Ljósmynd/Aðsend

Bókanirnar á speglahótelið hrannast inn og segir Ingibjörg næstu mánuði líta ansi vel út. Ljósmynd/Aðsend

Converted Watertower í Grindavík. Ljósmynd/Aðsend

Hugmynd þeirra Ingibjargar og Arnars að breyta vatnstanki í einbýlishús á þremur hæðum er algjörlega geggjuð. Ljósmynd/Aðsend

Það er nánast eins og gistirýmið og stofan á speglahótelinu séu úti í guðsgrænni náttúrunni. Ljósmynd/Aðsend