Búið er að opna vegina um Hellisheiði og Þrengsli að nýju en lokað var fyrir umferð um þá í gærkvöld.

Frétt af mbl.is

„Líklega versta veður ársins“

Fylgdarakstur var yfir Hellisheiði frá Hveragerði og frá Rauðavatni en honum var hætt á þriðja tímanum í nótt og á vef Vegagerðarinnar, umferdin.is, kemur fram að búið sé að opna vegina. Skyggni er slæmt vegna skafrennings og éljagangs og eru vegfarendur beðnir um að aka varlega.

Holtavörðuheiði og Öxnadalsheiði lokaðar

Vegurinn um Holtavörðuheiði er lokaður vegna veðurs og flutningabíls sem þverar veg og er ólíklegt að hægt verði að opna hann í dag. Þá er vegurinn um Öxnadalsheiði lokaður vegna veðurs.

Þá kemur fram á vef Vegagerðarinnar að margir vegir verði á óvissustigi eftir hádegi í dag, þar á meðal Reykjanesbraut, Hellisheiði og Mosfellsheiði.

Frétt af mbl.is

Biðla til forsjáraðila barna vegna illveðurs

Spáð er mjög slæmu veðri eftir hádegi í dag og hefur Veðurstofa Íslands gefið út appelsínugular viðvaranir fyrir höfuðborgarsvæðið, Suðurland, Faxaflóa og Breiðafjörð klukkan tvö og þegar líður á daginn verða komnar appelsínugular viðvaranir um allt landið vegna illviðris og gilda þær fram á morgundaginn.