Búist er við skörpum veðraskilum yfir vestasta hluta landsins fyrripart dags að því er fram kemur í tilkynningu frá Veðurstofu Íslands.

Ný lægð nálgast úr suðri og fer lægðamiðja hennar norður yfir landið vestanvert í dag.

Frétt af mbl.is

Seinni bylgja illviðrisins gengur yfir í dag

„Austan megin við skilin heldur sunnan óveðrið áfram og mun geisa á stærstum hluta landsins, sunnan 25-30 m/s með snörpum og varasömum vindhviðum og talsverðri rigningu á köflum. Vestan þeirra verður mun hægari vindur, kalt og snjókoma, sérstaklega á Vestfjörðum og Breiðafirði og hluta Faxaflóa,“ segir í tilkynningunni.

Frétt af mbl.is

Fylgstu með óveðrinu ganga yfir

Fram kemur að staðan á vesturhluta landsins sé viðkvæm, því ef veðraskilin hliðrast lítillega frá spám, getur veðrið orðið mjög ólíkt því sem búist var við. 

Seinnipart dags er gert ráð fyrir að skilin færist til austurs, með suðvestan strekkingi eða allhvössum vindi og éljum vestanlands. Á Austfjörðum verður veðrið verst lengst og lægir ekki fyrr en undir kvöldmat.