Ævintýramennirnir Bertrand Piccard frá Sviss og Brian Jones frá Bretlandi skráðu nafn sitt í sögubækurnar í morgun er þeir flugu Breitling-loftbelg sínum yfir Norður-Afríku og urðu þar með fyrstir manna til að komast hringinn í kringum jörðina í loftbelg.

Það var klukkan 9.54 að íslenskum tíma sem hinn 55 metra hái loftbelgur fór yfir Mauritaniu í Afríku og lauk þar með ferðinni sem var 26.500 mílna löng og tók þá félaga 19 daga. Mikill fögnuður braust út í stjórnstöðinni í Sviss og einnig í loftbelgnum þar sem hann þaut áfram á um 100 kílómetra hraða. Eftir að hafa skálað í kampavíni sögðu stjórnendur á jörðu niðri að nú væri stefnt að því að komast til Egyptalands og lenda belgnum á eða í grennd við pýramída. Einn af þeim fyrstu til að óska félögunum til hamingju var Richard Branson sem hefur gert fjórar misheppnaðar tilraunir til að komast hringinn um jörðina í loftbelg. „Ég er ef til vill dálítið hlutdrægur, en þetta er mikið afrek hjá þeim og í raun er þetta síðasta merkilega metið sem eftir var í flugsögunni," sagði Branson.