Heilbrigðisyfirvöld í Taívan leita nú að fimm erlendum farþegum er voru í sömu flugvél og maður, sem greinst hefur með bráðalungnabólgu. Maðurinn starfar á rannsóknastofu á Taívan og virðist hafa komist þar í snertingu við veiruna sem veldur sjúkdómnum. Hann fór í kjölfarið á læknaráðstefnu í Singapúr, en þegar hann kom heim aftur veiktist hann. Stjórnvöld í Singapúr settu í gær um 70 manns, sem átt höfðu samskipti við Taívanbúann, í einangrun, og stjórnvöld á Taívan fylgjast nú með fólki sem maðurinn átti samskipti við dagana áður en hann veiktist.

Sóttvarnaskrifstofa Taívans segir að haft hafi verið samband við 13 Taívanbúa, sem sátu nálægt manninum í flugvél á leið frá Singapúr til Taívans, og þeir beðnir að leita samstundis læknis ef þeir fái hita eða önnur sjúkdómseinkenni. Enn er leitað að fimm erlendum ríkisborgurum, þremur Bandaríkjamönnum, einum Japana og einum Singapúrbúa, sem sátu nálægt manninum.

Óttast er að nýr bráðalungnabólgufaraldur kunni að brjótast út í Asíu.

• Blogga um frétt