Hegðun Saddams fyrir dómi mikið rædd í bandarískum fjölmiðlum

Bandarískir fjölmiðlar voru í dag sneisafullir af fréttum um hegðun Saddams Hussein, fyrrum Íraksleiðtoga, fyrir dómi í gær. Þótti Saddam þvermóðskufullur í dómsal og ekki sýna merki iðrunar. Sjö ákæruatriði voru lögð fram gegn Saddam í gær. Hann er meðal annars ákærður fyrir að hafa framið fjöldamorð á Kúrdum og sjítum og fyrir innrásina í Kúveit.

Saddam sýndi engin merki iðrunar. Hann réttlætt innrásina í Kúveit, neitaði að undirrita dómskjöl og sagði að Bush, Bandaríkjaforseti, væri hinn raunverulegi þorpari.

„Þvermóðskufullur Saddam hlýðir á ákæruatriði fyrir dómi“ sagði í Washington Post. Þar voru jafnframt eftirfarandi ummæli Saddams feitletruð: „Ég er Saddam Hussein, forseti íraska lýðveldisins,“ og „Allir vita að þetta er leikhús glæpamannsins Bush og hluti af tilraun hans til að vinna forsetakosningar.“

Jafnframt var fjallað um ummæli Saddams í New York Times að hann væri enn forseti Íraks.