Utanríkisráðherrar Evrópusambandsins (ESB), ásamt ráðherrum á sviði neyðaraðstoðar- og heilbrigðismála, munu í vikunni halda skyndifund vegna aðstoðar við ríki á flóðasvæðum í Asíu, að því er embættismenn skýrðu frá í dag.
Áður hafði aðeins verið skýrt frá því að ráðherrar neyðaraðstoðar og þróunarmála innan ESB myndu sækja fundinn.
„Utanríkisráðherrar, ráðherrar þróunarsamvinnu og heilbrigðisráðherrar innan ESB munu taka þátt í fundinum,“ sagði í tilkynningu vegna fundarins frá Lúxemborg, sem nú gegnir formennsku innan sambandsins.
Á fundinum mun Louis Michel, sem fer með hjálparstarf innan framkvæmdastjórnar ESB og Jean-Louis Schiltz, þróunarmálaráðherra Lúxemborgar, kynna skýrslur um málið. Þeir eru nú staddir á hamfarasvæðunum, að því er einnig greint var frá hjá ESB.